بلوچستان شونہالی نا کسر آ روان ءِ ، چائنہ پاکستان اکنامک کوریڈور نا ڈٹ آتا پوروی آ صوبہ ٹی شون نا پوسکن آ دور انا بناء مریک صدر مملکت ممنون حسین نا گورنر بلوچستان محمد خان اچکزئی و وزیراعلیٰ بلوچستان نواب ثناء اللہ خان زہری تون اوڑدہی ٹی ہیت وگپ
کوئٹہ۔(پاکستان نیوز پوائنٹ 04 اگست 2016ء) صدر مملکت ممنون حسین پارینے کہ بلوچستان شونہالی نا کسر آ روان ءِ و چائنہ پاکستان اکنامک کوریڈور نا ڈٹ آتا پوروی آ صوبہ ٹی معاشی و راجی شون نا اسہ پوسکن ءُ دور اسے نا بناء مریک۔
پنچ شنبے آ داڑے گورنر ہاؤس اٹی گورنر بلوچستان محمد خان اچکزئی و وزیراعلیٰ نواب ثناء اللہ خان زہری تون اوڑدہی ٹی ہیت وگپ کرسا صدر بلوچستان اٹی امن وایمنی نا حالیت آتیا است جمی نا درشانی ءِ کرے و پارے کہ شرپسند آتون سختی اٹ مون تننگک۔
اوپارے کہ بلوچستان اٹی امن و شون اکن ہر حد اسکان کانہ۔ اوپارے کہ چائنہ پاکستان اکنامک کوریڈور پروجیکٹس، گوادر اٹی بھلا سمندر نا بندرگاہ نا اپ گریڈیشن، گوادر پورٹ ایکسپریس وے و گوادر انٹرنیشنل ایئر پورٹ صوبہ ٹی معاشی شون ءِ باوری جوڑ کیک و اوڑآن روزگار
نا زبردست وارخواہی ودی مریک۔
اوپارے کہ حکومت بلوچستان ءِ ایلو صوبہ غاتا بیربر ہتنگ کن صوبہ ٹی جاری غٹ شونداری ڈٹ آتا بروخت پوروی نا عزم کرینے۔
صدر صوبہ نا الس نا خذمت کن صوبائی حکومت نا کڑد انا ستاءِ کرے و پارے کہ شونداری ڈٹ آتا شفافیت و اوفتا بڑزکو معیار ءِ باوری جوڑ کننگ کن ڈویلپمنٹ پروجیکٹس نا پدریسہ مانیٹرنگ ءِ کننگے۔
اوپارے کہ جاری ڈٹ آتے کن ہر بہاء آ شفافیت و بڑزکو آب ءِ باوری جوڑ کروئی مرے۔ گورنر و وزیراعلیٰ بلوچستان بلوچستان نا شون اٹی زیات است خواہی ہلنگ آ صدر نا منت واری ءِ ادا کریر و اودے مچ آ صوبہ نا شونداری ڈٹ آتا جمی حالیت و اوفتے آ عملدرآمد نا بارواٹی آگاہ کریر۔
اوصوبہ نا شون ءِ باوری جوڑ کننگ کن بنجائی حکومت نا کمکاری و کل آسراتی تا فراوانی آ منت واری ءِ ادا کریر۔