روم (پاکستان نیوز پوائنٹ 9نومبر2016ء) اٹلی دی آئینی عدالت شادی شدہ جوڑیں دے بالاں دا خاندانی ناں پیو دے خاندانی ناں تے رکھنڑ آلے قنون کوں ختم کر ڈتا ۔میڈیا رپورٹس دے مطابق عدالت اچ وکیلاں آکھیا جو اے قنون تریمتاں دے نال امتیازی سلوک دے مترادف ہے ۔عدالت اپنڑے فیصلے اچ آکھیا ہے جو خاندانی ناں کوں خود کار طور تے والدین دی مرضی دے خلاف طے کر ڈیونڑ غیر قنونی ہے ۔
ایں کیس اچ مدعی برازیل اتے اٹلی نال تعلق رکھنڑ آلا ہک جوڑا ہا جیں دی خواہش ہئی جو ہسپانوی ملکاں دے روایت دے مطابق انہاں دے پتر کوں ڈوہیں والدین دے ناں دا مرکب بطور خاندانی ناں ڈتا ونجے ۔اٹلی دے حکام جڈاں انہاں دی اے درخواست نہ منی تاں انہاں انسانی حقوق دی یورپی عدالت نال رابطہ کیتا جیں 2014اچ انہاں دے حق اچ فیصلہ ڈتا ۔ایندے توں پہلے انسانی حقوق دی یورپی عدالت ایں قنون دی مذمت کیتی ہئی اتے اٹلی کوں آکھیا ہا جو او اینکوں تبدیل کرے ۔اے قنون قدیم روم دے ویلھے توں لاگو ہے ۔اٹلی اچ ایوان زیریں ایں قنون کوں تبدیل کرنڑ سانگے ہک بل پاس کر رکھیا ہے تاں جو ایوان بالا سینیٹ ا چ اینکوں کئی سالاں توں روکیا ویندا پئے ۔
