بیت المقدس اچ اذان تے پابندی نسل پرستانہ اقدام ہے، خطیب مسجد الاقصی

مقبوضہ بیت المقدس (پاکستان نیوز پوائنٹ 4 نومبر2016ء) مسجد الاقصی دے خطیب بیت المقدس اچ اذان تے پابندی لاونڑ دی مذمت کیتی ہے ۔رپورٹ دے مطابق مسجد الاقصی دے خطیب شیخ عکرمہ صبری اسرائیلی حکومت دی نسل پرستانہ پالیسیاں دی مذمت کریندے ہوئیں ایں گالھ تے زور ڈتاہے جو اذان ہک اسلامی عمل ہے جیں دی آواز، قیامت تئیں بیت المقدس دی فضا اچ گونجدی رہسی۔

واضح رہے جو بدھ کوں بیت المقدس دے اسرائیلی علاقیں دے میئر اسرائیلی پولیس اہلکاراں کوں بقون انہاں دے اذان نال تھیونڑ آلے شور کوں ختم کرنڑ دی درخواست کیتی ہئی ۔ واضح رہے جو ایں اقدام سانگے اسرائیلی ذرائع ابلاغ مدتاں توں ماحول بنڑا رکھیا ہا۔ صیہونی ذرائع ابلاغ دعوی کیتا ہا جو سویرے دی اذان نال غاصب صیہونی آباد کاراں کوں تکلیف پجدی ہے ۔ واضح رہے جو صیہونی حکومت مشرقی بیت المقدس اچ غیرقانونی طور تے15 وستیاں تعمیر کر رکھیا ںہن جیں اچ گھٹ توں گھٹ 2 لکھ ڈاہ ہزار اسرائیلی شہری آباد ہن۔