واشنگٹن(پاکستان نیوز پوائنٹ 27ستمبر 2016ء) کشمیری رہنماواں اقوام متحدہ دے سیکرٹری جنرل بان کی مون کوں آکھیا ہے جو مسئلہ کشمیر پاکستان اتے بھارت وچا ل جوہری جنگ دی وجہ بنڑ سگدے ایں کیتے ا وہ ذاتی مداخلت کریندے ہوئیں مسئلہ کشمیر کوں سلامتی کونسل وچ چاون، ایہ گالھ آزاد جموں تے کشمیر دے سابق صدر بیرسٹر سلطان محمود چوہدری ، وزیراعظم دے سابق مشیر برائے آزاد جموں تے کشمیر سردار ثروت خان ، ورلڈ کشمیر اویئرنیس دے سیکرٹری جنرل ڈاکٹر غلام نبی فائی اتے کشمیری امریکن کونسل دے صدر ڈاکٹر امتیاز خان اقوام متحدہ دے سیکرٹری جنرل بان کی مون کوں اپنڑے ہک خط وچ آکھی۔
جیندے وچ کشمیری رہنماواںں عالمی ادارے دی توجہ مقبوضہ کشمیر وچ انسانی حقوق دی وگڑدی ہوئی صورتحال آلے پاسے مبذول کرائی ہے۔ایہ خط عالمی ادارے دے سربراہ کوں ایجھے ویلھے پجایا گیا جڈاں بھارتی وزیر خارجہ سشما سوراج جنرل اسمبلی نال خطاب کریندیاں پئیاں ہن۔ ایں موقع تے بھارتی وزیر خارجہ دے خطاب دے دوران نیو یارک وچ اقوام متحدہ دے ہیڈ کوارٹر دے سامنڑے کشمیریاں احتجاجی مظاہرہ وی کیتا ۔
مظاہرین بھارت مخالف نعرے لاتے اتے کشمیر دی آزادی دا مطالبہ کیتا۔انہاں اقوام متحدہ اتے امریکا تے زور ڈتا جوا وہ مسئلہ کشمیر بارے وچ اقوام متحدہ دی سلامتی کونسل دیاں قرارداداں تے عملدرآمد کراونڑ۔خط وچ آکھیا گئے جو مقبوضہ کشمیر وچ حال وچ 105 توں ودھ کشمیری شہید اتے 10ہزار توں ودھ زخمی تھئے ہن۔جڈانجو بھارتی فوج ولوں پیلٹ گن دے استعمال نال بالاں اتے تریمتاں سمیت 600 توں ودھ کشمیری بینائی توں محروم تھی گئے ہن۔
خط وچ آکھی اگئے جوہک پاسے کریمیا وچ قتل عام تے واویلا اتے بئے پاسے مقبوضہ کشمیر وچ وڈی تعداد وچ کشمیریاں دے قتل عام اتے 1949ءدے جنیوا کنوینشن دی خلاف ورزی تے خموشی دوہرا معیار ہے۔کشمیری رہنماواں اقوام متحدہ دے سیکرٹری جنرل کوں آکھیا جو ایہ معاملہ اقوام متحدہ دی سلامتی کونسل وچ چاتا ونجے ۔انہاں دا آکھنڑ ہا جو ایں مسئلے دا حل مستقل ارکان دے رویاں اتے پالیسیاں تے منحصر ہے تاں جو انہاں کوں ایں گالھ نال آگاہ تھیونڑ چاہیدے جو مسئلہ کشمیر دے حل وچ ناکامی جنوبی ایشیاءوچ امن و امان سانگے شدید خطرہ ہے اتے پاکستان اتے بھارت وچال ہک بئی جنگ دی وجہ بنڑ سگدا ہے۔
جیندے پوری دنیا تے ودھ سارے اثرات مرتب ہوسن کیونجوہنڑ ڈوہائیں ملک جوہری صلاحیت دے حامل ہن۔کشمیری رہنماواں امید ظاہر کیتی جو اقوام متحدہ دے سیکرٹری جنرل دی ذاتی مداخلت نال مسئلہ کشمیر کو ںاقوام متحدہ دیاں قرارداداں اتے جموں تے کشمیر دی عوام دیاں امنگاں دے مطابق حل کرنڑ وچ مدد ملسی۔کشمیری رہنماواں اقوام متحدہ دے انسانی حقوق دے ہائی کمشنر دے بیان دا وی خیر مقدم کیتا۔جیندے وچ انہاں مقبوضہ کشمیر وچ انسانی حقوق دی صورتحال تے سخت تشویش ظاہر کریندے ہوئیں ہک غیر جانب دار اتے آزاد مشن مقبوضہ کشمیر بھیجنڑ دی تجویز ڈتی ہائی۔
