فلپائن روزگار سانگے کویت ونجنڑ سانگے شہریاں تے لاتی گی پابندی چا گھدی

منیلا (پاکستان پوائنٹ نیوز 17 مئی 2018ء) فلپائن روزگار دے سلسلے اچ کویت ونجنڑ سانگے شہریاں تے لاتی گی پابندی چا گھدی اے ۔فلپائنی حکومت دے ایں فیصلے نال ڈوہیں ملکاں وچال سفارتی جھیڑے دے خاتمے دی راہ ہموار تھی گی اے ۔عالمی ذرائع ابلاغ دے مطابق فلپائنی صدر دے ترجمان ہیری روک ہک بیان اچ آکھیے جو صدر سیکر ٹری سلویسٹر بیلو کوں کویت اچ فلپائنی ورکراں کوں بھیجنڑ تے لاتی گی پابندی پورے طور تے ختم کرنڑ دی ہدایت کیتی اے ۔ایندے توں پہلے ہی کویت تے فلپائن وچال ہزاراں فلپائنی تارکین وطن ورکراں دیاں ملازمتاں کوں باضابطہ بنڑاونڑ تے تحفظ سانگے ہک سمجھوتہ طے پاگے ۔ایندے تحت فلپائنی خادمیں کوں اپنڑے سیل فون تے پاسپورٹس کجھ شرطاں دے نال رکھنڑ دی اجازت ہوسی ۔