ٹوکیو (پاکستان نیوزپوائنٹ 15فروری2018ء) جاپان دے ماہرین صحت آکھے جو گرین ٹی (ساوی چاہ)دا مسلسل استعمال ایل ڈی ایل کولیسٹرول کوں گھٹ کر تے دل دیاں بیماریاںخاس طور تے ہارٹ اٹیک نال تھیونڑ آلی موت دے خطریاں کوں گھٹ کریندے ۔ جاپان اچ 40 ہزار رضاکاراں تے کیتے گئے مطالعہ توں معلوم تھئے جو ہک ڈینھ دے دوران پنج کپ گرین ٹی پیونڑ آلے بندیاں اچ ایل ڈی ایل کولیسٹرول گھٹ تھئے اتے ایندے نال ہارٹ اٹیک نال تھیونڑ آلی موت دا خطرہ 26 فیصد گھٹ تھی گئے ۔
ماہرین دا آکھنڑ ہے جو گرین ٹی اچ پولی فینالک دی ودھ ساری مقدار موجود ہوندی ہے ،جیرھی جو سرطان جئی موذی بیماری نال لڑن دی قوت مدافعت ڈیندی ہے۔ دل دیاں مرضاں اچ گرین ٹی پیونڑ مریض کوں تقویت ڈیندے۔ ہاضمے دی خرابی ہو ئے یا ول ذیابیطس کنٹرول کرنڑ ، ساوی چاہ ہر بیماری سانگے چنگی دوا دادرجہ رکھیندی ہے۔ گرین ٹی دیاں پتیاں کوں پانڑیں اچ پکیندے ہوئیں اگر دارچینی داہک ٹوٹا وی رلا گھدا ونجے تاں جگر دیاں بیماریاں ، یرقان ، خارش ،جوڑاں دا درد ، دنداں دی بیماریاں ، الرجی، دمہ، اعصابی کمزوری، ودھدی عمر دی کمزوری اتے معذوری دے خدشات کوں وی گھٹ کریندے۔ماہرین دا آکھنڑ ہے جو ہک ڈینھ اچ ساوی چاہ دے 5 کپ توں ودھ نی پیونڑ چاہیدا۔
