نیویارک (پاکستان نیوزپوائنٹ28ستمبر2017ء) پاکستان غیرامتیازی جوہری تخفیف سانگے اپنڑے عزم دا اعادہ کریندے ہوئیں آکھیا ہے جو پاکستان جوہر تخفیف دے عالمگیر، غیرامتیازی اتے قابل تصدیق مقاصد تے اہداف دے حصول سانگے پورے طور تے پر عزم ہے۔اے گالھ اقوام متحدہ اچ پاکستان دے مندوب خلیل ہاشمی جوہری ہتھیاراں دے پورے خاتمے دے بین الاقوامی ڈینھ دے موقع تے جنرل اسمبلی دے خصوصی اجلاس توں خطاب کریندے ہوئیں آکھی ،ایں اجلاس اچ پاکستان سمیت 46ملکاں دے مندوبین شرکت کیتی ۔
اجلاس دے شرکا جزیرہ نما کوریا دی صورت حال دے تناظر اچ ہر قسم دے جوہری ہتھیاراں دے خاتمے سانگے سیاسی عزم دی ضرور ت تے زور ڈتا ۔پاکستانی مندوب اپنڑے خطاب اچ آکھیا جو پاکستان تخفیف اسلحہ تے جوہری کھنڈاﺅ دے چیلنج نال نبڑنڑ سانگے صاف شفاف تے منصفانہ کوششاں دی حمایت جاری رکھیسی ۔انہاں آکھیا جو افسوس دی گالھ ہے جو کجھ ملکاں کوں اپنڑے فائدے تے ڈوجھیں دے ضیان دے نظریہ تے عمل پیرا تھی تے ایجھے اقدامات دا مطالبہ کریندے پن جیرھا جو انہاں دی سلامتی سانگے تاں مفید ہن لیکن ایندے نال ڈوجھیں دی سلامتی تے تقاضے کوں ودھ سارا خطرہ ہے ایں طرح دے امتیازی طرز عمل نال ہتھیاراں دی تخفیف دی عالمگیر کوششاں کچیاں تھی ویسن ۔
پاکستانی مندوب آکھیا جو جنوبی ایشیا دے خطے اچ بھارت جوہری دھماکے کرنڑ اچ پہل کیتی تے 1974اچ جوہری تجربہ کیتا ایندے بعد 1998اچ بھارت ڈوجھا جوہری تجربہ کیتا ،ایندے باوجود پاکستان خطے کوں جوہری ہتھیاراں توں پاک خطہ بنڑاونڑ دی حمایت کریندا ہے اساں جوہری تجربے تے قانونی پابندی دی پاکستان تجویز دے پاسے عالمی برادری دی توجہ ڈیواونڑ چاہندوں ۔
