امریکہ دا دورہ بہوں مثبت رہیا ،پاکستان د ا موقف وڈے چنگے اندا ز اچ پیش کیتا ،کشمیر دے معاملے تے پاکستان دا موقف چنگے طریقے نال نشابر کیتا ،امریکی صدر نال عشائیے تے غیر رسمی ملاقات تھی ،پاکستان اچ جمہوریت دی مضبوطی کوں دنیا من گھدا ہے ،افغانستان اچ جنگ دے ذریعے امن ممکن کائنی ،وزیر اعظم شاہد خاقان عباسی دی میڈیا نال گالھ مہاڑ

نیویارک (پاکستان نیوزپوائنٹ22ستمبر2017ء) وزیراعظم شاہد خاقان عباسی آکھیا ہے جو امریکہ دا دورہ بہوں مثبت رہیا ،پاکستان د ا موقف وڈے چنگے اندا ز اچ پیش کیتا ،کشمیر دے معاملے تے پاکستان دا موقف چنگے طریقے نال نشابر کیتا ،امریکی صدر نال عشائیے تے غیر رسمی ملاقات تھی۔مختلف ملکاںدے سربراہیں نال ملاقاتاں تھیاں ،پاکستان اچ جمہوریت دی مضبوطی کوں دنیا من گھدا ہے ،افغانستان اچ جنگ دے ذریعے امن ممکن کائنی ۔

افغان عوام کوں خود بہہ تے مسئلے دا حل کڈھنڑاں ہوسی ۔او اقوام متحدہ دی جنرل اسمبلی دے 72ویں اجلاس دے بعد میڈیا نال گالھ مہاڑ کریندے پے ہن ۔وزیر خارجہ خواجہ آصف اتے اقوام متحدہ اچ پاکستان دی مستقل مندوب ڈاکٹر ملیحہ لودھی وی ایں موقع تے موجود ہن ۔وزیراعظم شاہد خاقان عباسی آکھیا جو ہر جاہ پاکستان دے موقف کوں چنگے طریقے نال پیش کیتا ۔پاکستان دا موقف بھرپور طریقے نال پیش کیتا ۔

اقوام متحدہ دے سیکرٹری جنرل کو ںکشمیریاں تے ظلم دا ڈوزیئر پیش کیتا، اقوام متحدہ دے سیکرٹری جنرل نال ملاقات اتے جنرل اسمبلی توں خطاب اچ کشمیر دا مسئلہ بھرپور انداز نال چاتا ہے۔ انہاںآکھیا جو امریکی صدر نال عشائیے تے غیر رسمی ملاقات تھی،امریکی صدر ٹرمپ پر تپاک انداز نال ملیے ۔انہاں آکھیا جو صدر ٹرمپ دی تقریر لمبی تھی ونجنڑ دی وجہ توں افغان صدر نال ملاقات کائنی تھی سگی ۔وزیراعظم آکھیا جو اساں افغانستان اچ امن چاہندوں ۔انہاں آکھیا جو دہشت گردی دے خلاف پاکستان ودھ ساریاں قربانیاں ڈتیاں ہن اج دہشت گردی دے خلاف صرف پاکستان ہی جنگ لڑ دا ہے ،دہشت گردی دے خلاف قربانیاں دا عوام اعتراف کیتا ہے ۔پاکستان اچ جمہوریت دی مضبوطی کوں دنیا من گھدا ہے ۔