اقوام متحدہ (پاکستان نیوزپوائنٹ22ستمبر2017ء) پاکستان کشمیر دے حوالے نال اقوام متحدہ دی سلامتی کونسل دیاں قرار داداں تے عمل در آمد سانگے اقدامات دا مطالبہ کریندے ہوئیں آکھیا ہے جو مسئلہ کشمیر دے منصفانہ تے پر امن حل سانگے اقوام متحدہ دا خصوصی نمائندہ مقرر کیتا ونجے ،بین الاقوامی برادری صورت حال کوں خطرناک تھیونڑ توں بچاونڑ سانگے فیصلہ کن کردار ادا کرے ۔
خمیس کوں اقوام متحدہ دی جنرل اسمبلی دے 72ویں اجلاس توں خطاب کریندے ہوئیں وزیراعظم شاہد خاقان عباسی بھارت دے قبضے کشمیر اچ اپنڑے حق خود ارادیت دے حصول سانگے جدو جہد کرنڑ آلے نہتے عوام تے ظلم تے ودھ ساری تشویش دا اظہار کریندے ہوئیں آکھیا ہے جو بھارت کشمیریاں کوں دباونڑ سانگے طاقت دا اندھا دھند استعمال کریندا پیا ہے ،تریمت ،بالاں تے نینگراں کوں بلا امتیاز نشانہ بنڑایا ویندا پے ۔
ہزاراں دی تعداد اچ نشوم کشمیری مارے گے ہن تے زخمی تھے ہن ۔شارٹ گن پیلٹ نال بالاں سمیت ہزاراں دی تعداد اچ کشمیری اپنڑی نظر توں محروم یا معذور تھی گے ہن ۔ایں طرح دے بئے ظلم جینوا کنونشن دی خلاف ورزی تے جنگی جرائم دے زمرے اچ آندے ہن ۔وزیراعظم اپنڑے خطاب اچ جنگ نال تباہ حال افغانستان اچ امن سانگے پاکستانی خواہش ،پاکستان دی انسداد دہشت گردی سانگے کوششاں تے قربانیاں ،مشرق وسطی اچ صورت حال ،اقوام متحدہ اچ اصلاحات ،ماحولیاتی تبدیلی ،پاکستان اچ جمہوریت تے معاشی استحکام تے وی گالھ مہاڑ کیتی ۔
انہاں ہمسایاں دے نال امن دے نال رہنڑ دی پاکستان خواہش دا اظہار کریندے ہوئیں آکھیا ہے جو پاکستان بھارت دے نال کشمیر سمیت سارے پرانڑیں جھیڑے دے حل سانگے جامع مذاکرت دی بحالی تے امن تے سلامتی کوں برقراررکھنڑ سانگے اقدامات تے گالھ مہاڑ کرنڑ چاہندے تاں جو انہاں آکھیا انہاں مذاکرات سانگے بھارت کوں پاکستان دے خلاف ریاستی پشت پناہی نال کیتی ونجنڑ آلی دہشت گردی ،پاکستان دے خلاف تخریب کاری دی مہم توں اجتناب کرنڑاں ہوسی ۔
کشمیر دی صورت حال دا ذکر کریندے ہوئیں وزیراعظم شاہد خاقان عباسی جنر ل اسمبلی دے اجلاس اچ شریک دنیا دے اعلیٰ سطح وفد کوں ڈسایا جو بھارت مقبوضہ کشمیر اچ کشمیریاں کوں انہاں دے حق خود ارادیت توں محروم کرنڑ تے جدوجہد آزادی کوں دباونڑ سانگے 7لکھ فوج تعینات کر رکھی ہے ۔انہاں آکھیا اجوکی تاریخ اچ کہیں وی غیر ملکی فوج ولوں تعینات کیتی ونجنڑ آلی اے ساریں توں وڈی تعداد ہے ۔
انہاں آکھیا جو اج کشمیری عوام بھارت دے تسلط توں آزاد تھیونڑ سانگے ہک تاریخی تے مقبول جدو جہد کریندے پے ہن ۔انہاں آکھیا جو او اقوامی متحدہ دی جنرل اسمبلی دے 72ویں اجلاس دی صدارت تے میروسلیو لجکن کوں مبارخ ڈیندے ہن ۔انہاں آکھیا جو میکوں یقین ہے جو او اپنڑے عوامی خدمت تے بین الاقوامی تعلقات دے طویل تجربے تے بین الاقوامی تعلقات کوں بروئے کار لیندے ہوئیں دنیا کوں درپیش سلامتی ،ترقی تے گورننس دے چیلنج نال نبڑنڑ سانگے کامیاب رہنمائی ڈیسن ۔
انہاں کشمیر اچ بھارتی ظلم دی بین الاقوامی تحقیقات دا مطالبہ کریندے ہوئیں اقوام متحدہ دے سیکر ٹری جنرل تے انسانی حقو ق دے ہائی کمشنر تے زور ڈتا جو او بھارت دے قبضے اچ کشمیر اچ انسانی حقوق دیاں خلاف ورزیاں دا پتہ لواونڑ تے ایندے ذمے واراں کوں سزا ڈیواونڑ تے متاثرین کوں انصاف تے ریلیف ڈیونڑ سانگے انکوائری کمیشن بھجواون ۔انہاں آکھیا جو پاکستان بین الاقوامی برادار ی تے زور ڈیندا ہے جو او مقبوضہ کشمیر اچ پیلٹ گناں نال کشمیر یاں تے حملے تے نہتے شہریاں تے تشدد تے ظلم دا سلسلہ رکواون ۔
ریاستی پالیسی دے طور تے تریمتاں نال زیادتیاں دا سلسلہ بند کرایا ونجے ۔میڈیا دا بلیک آﺅ ٹ ختم کیتا ونجے ۔وزیرا عظم آکھیا جو بھارت مقبوضہ کشمیر اچ اپنڑے ظلم توں توجہ ہٹاونڑ سانگے کشمیر اچ لائن آف کنڑول تے فائر بندی دی مسلسل خلاف ورزی کریندا پیا ہے ۔انہاں آکھیا جو اجوکے سال جنوری توں ہنڑ تئیں بھارت فائر بندی دی 600خلا ف ورزی کیتی ہے ۔
پاکستان ایں صورت حال تے تحمل دا مظاہرہ کیتا ہے ۔لیکن اگر لائن آف کنڑول تے بھارت کہیں وی قسم دی مہم جوئی دا ارتکاب کریسی تاں پاکستان ایندے خلاف محدود جنگ دے ڈاکٹرین تے عمل پیرا تھیسی تاں اینکوں مضبوط تے برابر دا جواب ڈتا ویسی ،۔وزیراعظم شاہد خاقان عباسی آکھیا جو بین الاقوامی برادری صورت حال کوں خطر ناک تھیونڑ توں بچاونڑ سانگے فیصلہ کن کردار ادا کرے ۔
ایں سلسلے اچ اقوام متحدہ دے سیکر ٹری جنرل کشمیر کشمیر تے خصوصی نمائندہ مقرر رکن جیرھا جو سلامتی کونسل دیاں قرار داداں تے عمل در آمد کراوے ۔وزیرا عظم شاہد خاقان عباسی پاکستان دا واضح موقف پیش کریندے ہوئیں آکھیا ہے جو پاکستان افغانستان دی جنگ کوں اپنڑی سرزمین تے لڑنڑ کائناں ڈیسی ،انہاں آکھیا جو اساں کہیں ایجھی ناکام حکمت عملی دی توثیق کائنی کر سگدے جیرھی جوپاکستان تے افغانستان تے بئے علاقائی ملکاں دے عوام دی تکلیف اچ ودھارے نال اینکوں طویل کر ڈیسی ۔
انہاں آکھیا جو افغانستان اچ فوجی یا سیاسی تعطل سانگے مورد الزام ٹھہراونڑ خاص طور تے پاکستان سانگے تشویش دا باعث ہے ۔انہاں آکھیا جو پاکستان دہشت گردی دے خلاف عالمی جنگ اچ بہوں ودھ سارا مالی ضیان چات ا ہے ۔انہاں آکھیا جو اساں کہیں وی قربانی دا بکرا بنڑنڑ سانگے تیار کائنی ،طالبان دیاں محفوظ پناہ گاہیں پاکستان اچ کائنی بلکہ افغانستان اچ طالبا دے قبضے اچ وسیع علاقے اچ ہن ۔
انہاں آکھیا جو سرحد پا ر توں حملے ضرور تھیندے ہن لیکن اے حملے ودھ تر سحد دے ایں پار موجود محفوط پناہ گاہیں نال پاکستان مخالف دہشت گرداں ولوں کیتے ویندے ہن ایں طرح دے حملے روکنڑ سانگے پاکستان افغان حکومت تے اتحادی فورسز کوں آکھیا ہے جو او سرحد کوں کنڑول کرنڑ سانگے نظام کوں مضبوط بنڑاوے تے نقل و حرکت دی نگرانی سانگے پاکستان دی جاری کوشش دی حمایت کرے ۔
انہاں آکھیا جو گزریل چا ر سالاں توں غیر ملکی مداخلت نال ڈوہیں ملکاں دے عوام کوں ضیان تھیا ہے ۔انہاں آکھیا جو پاکستان توں ودھ افغانستان اچ امن دا کوئی تے خواہشمند کائنی تاں جو افغانستان اچ 16سالاں دی جنگ دے بعد اے گالھ واضح ہے جو افغانستان اچ امن کوں جنگ جاری رکھ تے بحال کائنی کیتا ونج سگدا ۔کوئی وی فریق ہک ڈوجھے تے فوجی حل لاگو نی کر سگدا ۔
انہاں آکھیا جو پاکستان ایں گالھ تے یقین رکھیندا ہے جو افغانستان اچ وختی تے حقائق تے مبنی مقصد اچ افغانستان اچ داعش ،القاعدہ تے انہاں دے حمایتی دے خاتمے سانگے وی پکے اقدامات ہوونڑیں چاہیدے ہن ۔وزیرا عظم آکھیا جو پاکستان دہشت گردی دے خلاف اقدامات تے سوال نی چاتا ونج سگدا۔انہاں آکھیا جو نائن الیون دے بعد پاکستان دیاں کوششاں نال ہی القاعدہ دا خاتمہ کیتا گیا ۔
انہاں آکھیا جو پاکستان فوجی اپریشناں نال پہاڑی علاقیں توں سارے عسکریت پسند گروپاں کوں ختم کر ڈتا ۔انہاں آکھیا جو پاکستان دہشت گردی دے خلاف باری قیمت چکائی ہے ۔6500فوجی تے قانون نافذ کرنڑ آلے اہلکاراں سمیت 27ہزار پاکستانی تے ایں جنگ اچ شہید تھے ۔وزیراعظم دہشت گردی دے عالمی مسئلے نال جامع طور تے نبڑنڑ دی ضرورت تے زور ڈیندے ہوئیں انسداد دہشت گردی دی عالمی حکمت عملی تے اہم نقص دا ذکر کیتا جیں دی وجہ توں ایں مسئلے نال نبڑنڑ اچ ناکامی تھی ۔
انہاں دہشت گردی دی بنیادی وجوہات نال نبڑنڑ دی ضرورت تے زور ڈیندے ہوئیں آکھیا جو دہشت گردی دی بنیادی وجہ غربت تے جہالت کائنی ۔وزیر اعظم آکھیا جو دہشت گردی دی وجوہات اچ نا انصافی ،جبر تے غیر ملکی مداخلت سمیت سارے سیاسی تے ڈوجھیاں محرومیاں تے بہوں رد عمل وی ہے ۔انہاں آکھیا جو انہاں وجوہات کوں ختم کیتے بغیر دہشت گرد گروپاں دے بیانے نال نبڑنڑ اوکھا تھی ویسی ۔
وزیراعظم آکھیا جو پاکستان کوں ہک مخالفانہ تے ودھدی ہوئی عسکری قوت آلے ہمسائے دا سامنڑاں ہے تے پاکستان سانگے قابل بھروسہ ڈیٹرننس سانگے اپنڑی صلاحیت کوں بر قرار رکھنڑاں ناگزیر ہے ۔انہاں آکھیا جو پاکستان اپنڑے جوہری ہتھیار صرف ایں سانگے بنڑائے ہن کیوں جو ایندے ہمسائے ایندے ہمسائے خطے اچ انہاں ہتھیاراں کوں متعارف کروایا ہے ۔اساڈے جوہری اثاثے جارحانہ دھمکیاں نال نبڑنڑ سانگے نا گزیر ہن ۔
انہاں آکھیا جو پاکستان دے جوہری اثاثے پوری طرح کنڑول اچ ہن جیں دا ماہرین اعتراف کیتا ہے ۔وزیراعظم آکھیا جو روہنگیا دے مسلماناں دی نسل کشی نہ صرف انسانی دے سارے بنیادی اقدار نا ل متصادم ہن بلکہ اے اساڈے اجتماعی ضمیر سانگے وی چیلنج ہن ۔انہاں آکھیا جو غربت ، بیماریوں، ماحولیاتی تبدیلیاں، ایٹمی پھیلاﺅ، دہشت گردی اتے جبری بیدخلی دے مسلے نال نبڑنڑ سانگے بین الاقوامی تعاون ناگزیرہے ۔
وزیراعظم آکھیا جو پاکستان اقوام متحدہ دے سیکر ٹری جنرل ولوں امن ،سلامتی ترقی تے انتظام اچ اقوام متحدہ دی اہلیت کوں تقویت ڈیونڑ دیاں کوششاں دا خیر مقدم کریندا ہے ۔انہاں آکھیا جو پاکستان 207ملین دی نینگراں دی آبادی تے مشتمل ہے ایندے نال پر اعتماد ہے او دھدی ہوئی آمدن ،کھپت تے پیداوار کوں بروئے کار لالیندے ہوئیں اقتصادی حکمت عملی دے ذریعے خوشحالی دے پاسے ودھ ویسی ۔انہاں آکھیا جو پاکستان اپنڑے اہداف دے حصول سانگے اپنڑے ملک دے اندر اپنڑیاں سرحداں دے آسے پاسے سلامتی چاہندا ہے ۔انہاں آکھیا جو ساں ساریاں ریاستاں دے نال برابری تے خود مختاری دی بنیاد تے چنگے تعلقات چاہندوں تے اساں دوستی تے تعاون دیاں ساریاں پیشکش تے مثبت طور تے اگی تے ودھ ویسوں ۔
