اقوام متحدہ (پاکستان نیوزپوائنٹ20ستمبر2017ء) پاکستان میانمار اچ روہنگیا مسلماناں دی حالت زار تے تشویش دا اظہار کریندے ہوئیں اسلامی ملکاں دی تنظیم (او آئی سی) توں مطالبہ کیتا ہے جو او روہنگیا دے مسلمان بھراواں دے ضمیر دی سانجھی آواز بنڑ ونجنڑ اچ اپنڑاں کلیدی کردار ادا کرے ۔اقوام متحدہ دے ہیڈ کوارٹر اچ منگل کوں 57ملکاں دی تنظیم او آئی سی دے رابطہ گروپ اجلاس توں خطاب کریندے ہوئیں وزیراعظم شاہد خاقان عباسی او آئی سی کوں یقین ڈوایا جو پاکستان ایں نیک مقصد سانگے اپنڑی بھر پور حمایت کریسی ۔
انہاں آکھیا جو او آئی سی یا اقوام متحدہ ولوں انسانی ہمدردی دی بنیاد تے روہنگیا مسلماناں دی کہیں وی کوشش دی ودھ ساری حمایت کریسی ۔وزیراعظم آکھیا جو ہزاراں بے گناہ مرد ،تریمت تے بال میانمار اچ اپنڑیاں قیمتی جاناں دا ضیان کر بیٹھے ہن جڈاں جو اجوکے واقعات روہنگیاں دے مسلماناں دی نسل کشی دی زندہ مثال ہے ۔انہاں آکھیا جو ہنڑ تئیں 4لکھ توں ودھ روہنگیادے مسلماناں کوں اپنڑاں گھر بار چھوڑ ڈیونڑ تے مجبور کر ڈتا گیا ہے ۔
اے بے گناہ لوک پڑوسی ملکاں اچ پناہ لبھیندے ودے ہن ۔انہاں آکھیا جو روہنگیا دے مسلماناں دی ایں منظم نسل کشی تے امتیاز سلوک دا خاتمہ تھیونڑاں چاہیدا ہے ۔انہاں عالمی برادری تے زور ڈتا جو او روہنگیا دے مسلماناں تے ظلم انہاں دی نسل کشی روکنڑ سانگے میانمار دی حکومت تے ہر ممکن دباﺅ پاوے ۔پاکستان میانمار دی حکومت توں وی مطالبہ کیتا ہے جو او صورت حال اچ کشیدگی کوں گھٹ کرنڑ سانگے وختی اقدامات کرن تے روہنگیا دی مسلمان آباد ی دے تحفظ کوں یقینی بنڑاون ۔
پاکستان اقوام متحدہ توں وی مطالبہ کیتا ہے جو او وختی روہنگیا دے مسلماناں دی حالت زار دا جائزہ گھننڑ سانگے اقوام متحدہ دا فیکٹ فائنڈنگ مشن بھیجے تے انسانی ہمدردی دی بنیاد تے امداد بھیجنڑ دا بندو بست کرے ۔وزیراعظم آکھیا جو میانمار دی حکومت روہنگیا سارے مہاجراں دی محفوظ واپسی سانگے سازگار حالات پیدا کرتے انہاں دے جائزہ حق ڈیوے جیں اچ انہاں دی شہریت ،مذہبی آزادی تے میانمار دے برابر شہری دی حیثیت نال انہاں دا آزادانہ گھمنڑ پھرنڑ شامل ہے ۔
