واشنگٹن (پاکستان نیوزپوائنٹ11اگست2017ء) گلوبل انڈر گریجویٹ ایکسچینج پروگرام دے تحت امریکا دے تعلیمی اداریں اچ تعلیم دے حصول سانگے 96پاکستانی طالب علم تے طالبات دا ہک گروپ واشنگٹن پج گیا ۔اے طالب علم انجینئرنگ ،بزنس ،ایجوکیشن ،طب تے سماجی علوم اچ امریکی تجربیں توں فائدہ حاصل کریسن ۔امریکی نشریاتی ادارے دے مطابق پاکستان دے سارے صوبیں توں انہاں طالب علماں کوں اپنڑاں ہک سمسٹر امریکی تعلیمی اداریں اچ پورا کرنڑاں ہے ۔
ایں دوران ہر طالب علم کہیں ناں کہیں امریکی خاندان دے نال رہائش رکھیسی ،تاں جو او امریکی زبان ،ثقافت تے رہنڑ سہنڑ نال واقفیت حاصل کر سگن اتے ڈوہیں ملکاں وچال عوامی سطح تے ثقافتی تبادلے ممکن تھیون ۔انہاں طالب علماں دے اعزاز اچواشنگٹن اچ پاکستانی سفارتخانے ولوں ظہرانہ ڈتا گیا۔ ایں موقع تے خطاب اچ پاکستانی سفیر اعزاز چوہدری طالب علماں کوں پاک امریکہ تعلقات دی موجودہ صورت بارے ڈسایا ۔انہاں دا آکھنڑ ہئی جو ڈوہیں ملکاں جڈاں وی رل تے کم کیتا تاں ڈوہیں ملکاں کوں فائدہ تھیا ۔انہاں واضح کیتا جو پاکستان تے امریکہ وچال تعلیم ،صحت ،دفاع تے معیشت دے شعبیں اچ پرانڑیں تعاون دا سلسلہ جاری ہے ۔
