ہانگ کانگ(پاکستان نیوزپوائنٹ 17مئ2017ء) وزیراعظم محمد نواز شریف آکھیا ہے جو پاکستان پوری دنیا دے نال کاروباری تے تجارتی تعلقات دے ودھارے دا خواہش مند ہے ،اساڈی سٹاک مارکیٹ دنیا دی تکھے ترقی کرنڑ آلی وڈی مارکیٹ بنڑ گی ہے ،بین الاقوامی ریٹنگ ایجنسیاں پاکستان دی ترقی دی توثیق کیتی ہے ۔سی پیک دے تحت زیر تکمیل 9خصوصی اقتصادی زون اچ سرمایہ کاری دے ودھ سارے موقع موجود ہن ،انفارمیشن ٹیکنالوجی تے سیاحت دے شعبے کوں صنعت دا درجہ ڈتا ہے ،پاکستان دا شمار دنیا دی تکھے ترقی کریندی ہوئی معیشت اچ تھیندا ہے ،ملکی معیشت دی اصلاحات سانگے جامع اقداما ت کیتے گے ہن پائیدار اقتصادی ترقی پاروں پاکستان دا شمار دنیا دیاں 25وڈیاں معیشتاں اچ تھیسی۔
وژن 2025دے تحت پائیدار اقتصادی ترقی دے حصول دے اہداف سانگے جامع حکمت عملی بنڑائی گی ہے ۔انہاں خیالاں دااظہار وزیراعظم نواز شریف ہانگ گانگ اچ پاکستان سرمایہ کاری کانفرنس توں خطاب کریندے ہوئیں کیتا ۔انہاں آکھیا جو ہانگ گانگ دنیاد ی معیشت اچ اہم کردار ادا کریندا پیا ہے ۔پاکستان ہانگ گانگ دی معاشی ترقی توں متاثر ہے ۔پاکستان تکھے ترقی کرنڑ آلی معاشی طاقت بنڑ گیاہے ۔
تے سرمایہ کاری دے نویں موقع پیدا تھیندے پے ہن ۔سال 2013توں پہلے پاکستان دی مجموعی قومی پیداوار ( جی ڈی پی ) دی سالانہ شرح نمو ترائے فیصد ہئی جیرھی جو ودھ تے پنج فیصد تھی گی ہے تے آندے ڈو سال دے دوران سالانہ شرح نمو ست فیصد تئیں پج ویسی ۔وزیراعظم آکھیا جو پاکستان پائیدا ر اقتصادی ترقی ،گڈ گورننس تے معاشی نظم و ضبط دے تحت شرح نمو اچ ودھارا تھیا ہے ،توانائی تے بنیادی ڈھانچے سمیت مختلف ملکاںشعبے اچ سرمایہ کاری دے ودھ سارے امکانات موجود ہن ۔
انہاں آکھیا جو حکومت سماجی تحفظ دے حوالے نال جامع اقدا مات کریندی پئی ہے ۔ایندے علاوہ حکومت براہ راست غیر ملکی سرمایہ کاری دے ودھارے ،میکرو اکنامک استحکام بجٹ خسارے کوں گھٹ کرنڑ تے توانائی دے شعبے کوں ڈتی ونجنڑ آلی سبسڈی اچ گھٹکی سانگے اقدامات کریندی پئی ہے ۔وزیراعظم آکھیا جو پاکستان سٹاک ایکسچینج 4سال دے گھٹ عرصے دے دوران ترقی کیتی ہے جیرھا جو ملک اچ مالی تے اقتصادی استحکام دی علامت ہے ۔
وزیراعظم نواز شریف آکھیا جو عالمی بینک اجوکے مالی سال دے دوران جی ڈی پی اچ 5.2فیصد دی شرح نمو دی پیشکش کیتی جڈاں جو سٹینڈرڈ اینڈ پورز اچ اپنڑی ہک رپورٹ اچ آکھیا جو 2018تئیں ملک اچ غربت دی شرح اچ چنگی گھٹکی تھیسی ۔ایندے علاوہ کئی بین الاقوامی ریٹنگ ایجنسیاں وی پاکستان دی اقتصادی ترقی دی توثیق کیتی ہے ۔انہاں آکھیا جو اساڈی حکومت صرف اقتصادی ترقی تے توجہ کائنی ڈیندی پئی بلکہ پائیدار اقتصادی ترقی سانگے کم کریندی پئی ہے تاں جو معاشی ترقی دے ثمرات توں ودھ فائدہ چاتا ونج سگے ۔
وزیرا عظم نوا ز شریف آکھیا جو پاکستان کھیر پیدا کرنڑ آلا دنیا دا چوتھا وڈا ملک ہے جڈاں جو لائیو سٹاک دے شعبے دے حوالے نال پاکستان دا تریجھا وڈا ملک ہے انہاں آکھیا جو ملک اچ کھیر تے گوشت دی مقامی ضروریات اچ روز ودھارا تھیندا پیا ہے ۔ایندے علاوہ ائیر لائن بینکنگ تے سیاحت تے زراعت سمیت بئے مختلف شعبے اچ 100غیر ملکی سرمایہ کاری تے منافع دی وی 100فیصد منتقلی دی وی اجازت ہے ۔
جڈاں جو مختلف شعبے اچ خام مال ،مشینری تے پلانٹ وغیر ہ دی ڈیوٹی وی فر ی بر آمد دی اجازت ہے ۔انہاں آکھیا جو ملک اچ توانائی تے ٹرانسپورٹ دے حوالے نال دنیا دی تجارتی راہداری بنڑ سگدا ہے پاکستان دی جغرافیائی حیثیت خطے اچ بنیادی اہمیت دی حامل ہے انہاں آکھیا جو ون بیلٹ ون روڈ فورم چین دے صدر ژی جن پنگ دے وژن دی عکاسی کریندا ہے جیں دے تحت سارے ملکاں سانگے ترقی دے مساوی موقع دستیاب ہوسن ۔
۔چین پاکستان اقتصادی راہداری منصوبے دا حوالہ ڈیندے ہوئیں وزیر اعظم آکھیا جو سی پیک ون بیلٹ ون روڈ دے وژن دا وڈا حصہ ہے جیرھا جو نہ صرف خطے بلکہ پوری دنیا دیاں تجارتی سرگرمیاں اچ ودھارے اچ معاون ثابت تھیسی ۔جیں نال عالمی تجارت دے رابطے اچ ودھار ا تھیسی تے تجارتی سامان دی نقل دے اوقات اچ چنگی گھٹکی تھیسی جیں نال وسط ایشیا تے یورپ تے جنوبی ایشیا دے ملکاں کوں جوڑیا ویسی ۔انہاں آکھیا جو پاکستان آبادی دے حوالے نال دنیاد ا6واں وڈا ملک ہے جتھاں نینگر انسانی وسائل دی فراوانی ہے ۔وزیراعظم آکھیا جو پاکستان پوری دنیا دے نال اپنڑے کاروباری تے تجارتی تعلقات دے ودھارے دا خواہشمند ہے ۔
