دمشق (پاکستان پوائنٹ نیوز 21 مئی 2018ء) شام دے صدر بشار الاسد ایران اتے شام وچال اقتصادی تعاون دی سطح کوں ودھارا ڈیونڑ دی ضرورت تے زور ڈتے۔ایرانی خبر رساں ادارے مطابق شام دے صدر ایرانی وزیر برائے شہری ترقی عباس آخوندی نال تھیونڑ آلی ملاقات اچ گالھ بات کریندے ہوئیں آکھے جو شام، ایران سمیت سارے انہاں ملکاں دے نال جیرھے جو شامی خود مختاری اتے اقتداردا احترام کریندن اقتصادی اتے معاشی رابطیاں کوں ودھاونڑ سانگے تیار ہے۔
ایں موقع تے ایرانی وزیر آکھیا جو ایران شام اچ امن دے قیام سمیت سارے شعبیںاچ ہر ممکن تعاون سانگے تیار ہے اتے ایران شام دی تعمیر نو اچ اپنڑاں کردار ادا کرنڑ سانگے راضی ہے۔ایرانی وزیر دے دورہ شام دے موقع تے شامی وزیر خزانہ اتے غیرملکی تجارت سمر الخلیل وچال ہک معاہدے تے وی دستخط تھئے جیندے اچ ڈوہائیں ملکاں وچال تجارتی اتے اقتصادی تعلقات کوں ودھارا ڈیونڑ سانگے ہک نویں باب شروع تھیسی۔
