لاہور (پاکستان نیوز پوائنٹ 19ستمبر 2016ء) پاکستان کرکٹ بورڈ (پی سی بی ) کل بدھ کوں قذافی سٹیڈیم لاہور وچ تھیونڑ آلی آئی سی سی ٹیسٹ چیمپئن شپ ٹرافی دی تقریب دے انعقاددے سارے انتظامات مکمل کرگھدے ہن ۔ آئی سی سی ٹیسٹ رینکنگ وچ پاکستان کرکٹ ٹیم دی پہلی پوزیشن حاصل کرنڑ تے انٹر نیشنل کرکٹ کونسل لاہور وچ ہک تقریب وچ کپتان مصباح الحق کوں آئی سی سی ٹیسٹ چیمپئن شپ ٹرافی ڈتی ویسی۔
آئی سی سی دی تقریب کل بدھ کوں صبح ساڈھے 10 وجے قذافی سٹیڈیم لاہور وچ منعقد تھیسی۔ آئی سی سی دے چیف ایگزیکٹو ڈیوڈ رچرڈ سن قومی ٹیسٹ کرکٹ ٹیم دے کپتان مصباح الحق کوں ٹرافی پیش کریسن۔ ایں موقع تے سکیورٹی دے فول پروف انتظامات کوں حتمی شکل ڈے ڈتی گئی ہے۔ واضح رہوے جو آئی سی سی ٹیسٹ رینکنگ سسٹم 2003ء وچ متعارف کروایا ہا اتے پاکستانی ٹیم پہلی واری صباح الحق دی قیادت وچ آئی سی سی ٹیسٹ رینکنگ وچ پہلی پوزیشن حاصل کیتی ہے ۔
آئی سی سی دی موجودہ ٹیسٹ رینکنگ دے مطابق پاکستان دی ٹیم 111 پوائنٹس دے نال پہلی پوزیشن تے ہے، بھارت دی ٹیم 110 پوائنٹس دے نال ڈوجھی، آسٹریلیا دی ٹیم 108 پوائنٹس دے نال تریجھی، انگلینڈ دی ٹیم 108 پوائنٹس دے نال چوتھی ، جنوبی افریقہ دی ٹیم 96 پوائنٹس دے نال پنجویں، سری لنکا دی ٹیم 95 پوائنٹس دے نال چھیویں، نیوزی لینڈ دی ٹیم 95 پوائنٹس دے نال ستویں، ویسٹ انڈیز دی ٹیم 67 پوائنٹس دے نال اٹھویں، بنگلہ دیش دی ٹیم 57 پوائنٹس دے نال نویں جڈانجوزمبابوے دی ٹیم 8 پوائناں دے نال 10ویں پوزیشن تے ہے۔
