فیصل آباد (پاکستان پوائنٹ نیوز۔28 جولائی۔2016) پنجاب حکومت جاری مالی سال دے بجٹ اچ ہائر ایجوکیشن کمیشن کیتے مجموعی طور تے 46ارب 86کروڑ روپے رکھے ہن ۔ ایں رقم نال فیصل آباد سمیت بئے ضلعیاں اچ یونیورسٹیاں کیتے اضافی عمارتاں اتے ضروری وسائل ڈتے ویسن۔ اے گالہیں صوبائی وزیر ہائر ایجوکیشن و بہبود آبادی بیگم ذکیہ شاہنواز آکھیاں۔ او گورنمنٹ کالج وومن یونیورسٹی مدینہ ٹائون اچ سینڈیکیٹ دے پنجویں اجلاس دی صدارت کریندی پئی ہن ۔
اجلاس اچ یونیورسٹی دی انتظامیہ تے تدریسی کارکردگی، مالیاتی امور، مستقبل دے تعلیمی منصوبیاں اتے وسائل اچ ودھاراکرنڑ دے اقدامات دے علاوہ بئے متعلقہ معاملیاں دا جائزہ گھدا گیا۔ انہاںآکھیا جو تریمتیں کیتے تعلیمی اداریاں دی ترقی تے ودھ سارے فنڈز خرچ کیتے ویندے پئے ہن ۔ انہاں جڑانوالہ بائی پاس دے نیڑے 396ایکڑ زمین تے گورنمنٹ کالج وومن یونیورسٹی دے نویں کیمپس دی تعمیر کیتے اقدامات کوں تیزی نال اگوں ودھاونڑ دی ہدائت وی کیتی۔
انہاں وومن یونیورسٹی مدینہ ٹائون دے ہاسٹل دی تزئین تے بحالی کیتے منصوبہ تیار کرنڑدی وی ہدائت کیتی۔ ارکان اسمبلی اتے سینڈیکیٹ دے ارکان یونیورسٹی دی ترقی اتے تعلیمی سرگرمیاں اچ ودھارے کیتے کجھ تجویزاں پیش کیتن۔وائس چانسلر ڈاکٹر نورین عزیز قریشی تعلیمی کارکردگی ،بجٹ اتے یونیورسٹی دے بئے امور بارے ڈسایا۔
