ملتان (پاکستان نیوز پوائنٹ 24جنوری2016ء) وزیراعظم محمد نواز شریف آکھیا جو پورا پاکستان ترقی دے ثمرات توں فائدہ چیندا پے ، جیرھے لوکاں کوں ترقی دی سجھ بجھ کائنی او پاکستان دی ترقی دا رستہ روکنڑ چاہندے ہن ، حکومتاں اتے سیاستداناں دا کم عوام کوں دھرنیں ، جلسے جلوساں تے احتجاجاں تے لاونڑ یا انہاں کوں گمراہ کرنڑ کائنی بلکہ ملک تے قوم دی خذمت کرنڑ ہوندا ہے ، وڈے وڈے دعوے کرنڑ آلے ڈساون انہاں نواں پاکستان کتھاں بنڑایا ہے ، ٹی وی تے آ تے عجیب و غریب اتے الزام لاونڑ آلے ہک ڈینھ خود قوم دے سامنڑے بے نقاب تھی ویسن۔
انہاں خیالاں دا اظہار انہاں منگل کوں اتھاں ملتان میٹرو بس منصوبے دی افتتاحی تقریب توں خطاب کریندے ہوئیں کیتا ۔ایں موقع تے گورنر پنجاب رفیق رجوانہ، وزیراعلیٰ پنجاب شہباز شریف، وفاقی تے صوبائی وزرا اتے سینئر سیاستدان وی موجود ہن۔واضح رہے جو راولپنڈی ،اسلام آباد تے لاہور دے بعد ملتان تریجھا وڈا شہر ہے جیں اچ 28ارب روپے توں ودھ لاگت نال 18کلومیٹر طویل میٹرو بس منصوبہ پورا تھیا ہے ۔
وزیراعظم شرکاءتوں خطاب کریندے ہوئیں آکھیا جو اساں اتھاںصرف سیاست کرنڑ ،دھرنے ،ترقی دا رستہ روکنڑ ،قوم دا وقف ضائع کرنڑ ،کہیں تخریب کاری یا عوام کوں گمراہ کرنڑ سانگے نی بلکہ ملتان دے عوام کوں میٹرو دا تحفہ ڈیونڑ ملتان دی عوام سانگے اپنڑاں فرض کرنڑ آئے ہوں جیرھا جو تساڈا حق ہے او تہاکوں ڈیونڑآیوں ۔انہاں گھٹ توں گھٹ مدت اچ میٹرو منصوبہ پورا کرنڑ تے وزیراعلیٰ شہباز شریف اتے ملتان دے عوام کوں مبارخ باد ڈتی تے توقع ظاہر کیتی جو ایندے بقایا حصے دی تعمیر دی وختی شروع کیتی ویسی ،اگر اے حصہ موجودہ حکومت دے دور اچ پورا تھی گیا تاں بہوں چنگی گالھ ہے وزیراعظم آکھیا جو اے منصوبے دے افتتاح دے موقع ے ایں شہر توں منتخب ارکان قومی تے صوبائی اسمبلی کوں دعوت ڈتی ونجنڑی چاہیدی ہئی تاں جو او ڈیکھدے انہاں دے شہر کوں کیرھا تحفہ ملدا پیا ہے اتھاں میٹرو بنڑدی پئی ہے ۔
وزیراعظم آکھیا جو بہوں سارے لوک آکھدے پے ہن جو میٹرو ملتان دا کرایہ بئی میٹرو سروسز دے مقابلے اچ ودھ ہوونڑاں چاہیدا ہے لاہور اچ میٹرو بنڑیے چا ر سال تھی گے ہن راولپنڈی تے اسلام آباد دی میٹرو بنڑی توں ایں ویلھے وی ودھ کرایہ دا سوال اٹھیا ہئی میں آکھیا جو اگر لاہور تے راولپنڈی تے اسلام آباددا کرایہ 20روپے ہے تاں ملتان اچ وی ایہو کرایہ ہوونڑاں چاہیدا ہے ۔
حکومت ایں ضمن اچ ارباں روپے سالانہ سبسڈی دی مد اچ ڈیسی حکومت دے خرچے کرایہ توں حاصل تھیونڑ آلی آمدنی توں کتھائیں ودھ ہن اخراجات دے مقابلے اچ میٹرو دی آمدنی بہوں گھٹ ہے لیکن اچ حکومتی خرچے تے اینکوں پورا کرنڑاں ہے ۔وزیراعظم آکھیا جو میٹرو دی سہولت ساریں توںفائدہ سکولاں اتے کالجاں اچ ونجنڑ آلے طالب علماں ،استاداں تے بالڑیاں کوں تھیا ہے جیرھیاں جو نجی گاڈیاں تے ٹیکسیاں اچ سفر کرتے اپنڑے اداریں تے گھراں کوں مشکل نال پجدیاں ہن تے کئی گناہ ودھ کرایہ ڈیونڑاں پوندا ہئی ،وزیراعظم آکھیا جو اساں ساریں کوں غریب لوکاں سانگے سوچنڑاں چاہیدا ہے تے اے بہترین ٹرانسپورٹ ہے ۔
انہاں آکھیا جو ملتان دی شکل تے نقشہ بدلدا پیا ہے ،اے ہک قدیم شہر ہے اتے ایں سہولت تے اتھاں دے رہائشی اج وی خوش ہن ،اے منصوبہ ملتان کوں چار چندر لا ڈیسی ،ملتان جنوبی پنجاب دے بہترین شہر ہے اینکوں خوبصورت توں خوبصورت بنڑاون اساڈی ذمے واری ہے تے انشاءاللہ اینکوں بنڑیسوں وی سہی ۔انہاں آکھیا جو شہباز شریف کوں اے منصوبہ تے مبارخ ڈیندا ہا ،۔
جڈاں اساں اسلام آباد توں لاہور موٹر وے دا افتتاھ کرنر چلیے ہاسے تاں ایں بس اچ جاوید ہاشمی تے تہمینہ دولتانہ وی موجود ہن ،اج موٹر وے دا جال کھنڈ گیا ہے ایندی تعمیر بہوں زور تے ہے اے بہوں گھٹ عرصے اچ ملتان پجنڑ آلی ہے ۔اے موٹر وے صرف لاہور توں ملتان کائناں امسی بلکہ گوجرہ توں شور کوٹ توںخانیوال آندی پئی ہے ۔ایکسپریس وے وی اتھاں آندی پئی ہے ملتاں کوں اسلام آباد ونجنڑاں ہووے تاں اتھاں خانیوال ،عبدالحکیم روڈ تے فیصل آباد پنڈی بھٹیاں توں اسلام آباد تئیں سفر اچ اٹھ گھنٹے اچ طے تھیندا ہے ایں روڈ نال ساڈے چار گھنٹے اچ اسلام آباد پجنڑ ممکن تھی ویس ایں طرح ملتان تے لاہور دا سفر وی گھٹ تھی ویسی ایں وقف سفر دا دورانیہ پنج گھنٹے ہے موٹر وے تے اے فاصلہ ساڈے ترائے گھنٹے اچ پور اتھی ویسی ۔
وزیراعظم بجلی دے منصوبیں دا ذکر کریندے ہوئیں آکھیا جو انہاں دی تکمیل نال 10ہزار میگا واٹ بجلی اساڈے سسٹم اچ شامل تھی ویسی ،جڈاںتوں پاکستان بنڑیا ہے 15ہزار میگاواٹ توں ودھ بجلی بنڑائی گی ،ترائے سالاں دی محنت تے نگرانی نال 10ہزار میگاواٹ بجلی سسٹم اچ شامل تھی ویسی ۔2013اچ لوڈ شیڈنگ تے قابو پاونڑ مشکل ہئی ،16.16گھنٹے دی لوڈ شیڈنگ اساں ڈٹھی ہے ،اج اللہ سئیں دے فضل نال لوڈشیڈنگ گھٹ تھی ہے اتے اگلے سال لوڈ شیڈنگ مک ویسی کیوں جو بجلی دی پیداوار دے نویں منصوبے پورے تھیندے پے ہن ۔
کولیں دا جہاز کراچی پج گیا ہے ہنڑ اے کولہ ساہیوال دے کارخانے اچ پج ویسی جڈاں کوئلہ آگیا تاں بجلی وی آویسی کولیںنال چلنڑ آلا پلانٹ کم شروع کر ڈیسی وزیراعظم آکھیا جو بجلی تے توانائی دے منصوبے پورے ملک اچ جاری ہن کتھائیں 1300میگاواٹ دا پلانٹ ہے تاں کتھائیں 3600میگاواٹ دے کارخانے ہن ،گوادر کراچی سمیت ملک دے سارے حصیں اچ اے کارخانے لگدے پے ہن بھاشا ڈیم سانگے زمین ملھ گھن گھدی گی ہے ایندے ایندے علاوہ پانڑیں دا وڈا ذخیر ہ بنڑدا پیا ہے جیرھا جو منگلا ڈیم تے تربیلا ڈیم توں وی وڈا ہوسی۔
اساڈے کاشکاراں سانگے پانڑیں تے بجلی ڈیسی تے پاکستان دیاں زمیناں کوں سیراب کریسی ،ایندے نال زراعت ترقی کریسی فصلاں ودھ ویسن وزیراعظم آکھیا جو اساں بجلی دیاں قیمتاں گھٹ کریسوں تاں جو غریب لوک وی اینکوں استعمال کر سگن انہاں آکھیا جو حکومت تعلیمی اداریں اتے صحت دے وی وڈے پروگرام شروع کیتے ہن اتھاں نویں ہسپتال بنڑسن ملتان دے اندر نیشنل ہیلتھ انشورنس سکیم وی آونڑ آلی ہے ۔
وزیراعظم ایں موقع تے کمشنر ملتان ڈویژن کیپٹن (ر) اسد اﷲ خان ولوں میٹرو منصوبے سانگے ڈینھ رات کم کرنڑ تے انہاں دی تعریف کیتی ۔انہاں آکھیا جو اگر سرکاری ملازم ایں جذبے نال خذمت کریسن تاں انشاءاللہ اپنڑے شہر دے لوک انہاں کوں دعائیں وی ڈیسن تے محبت وی کریسن ۔انہاں سبطین فضل دی وی منصوبے سانگے خذمت کوں سراہیا ۔وزیراعظم آکھیا جو لاہور دی میٹر و بس تے راولپنڈی اسلام آباد میٹرو بس منصوبہ وی انہاں بنڑایا ہے تے ہنڑ ملتان میٹرو بس دا منصوبہ وی انہاں بنڑایا ۔
بہاولپور، فیصل آباد، رحیم یار خان، سرگودھا اتے گوجرانوالہ اچ وی میٹرو بس سروس ایہے بنڑیسن ، چیف سیکریٹری پنجاب وی انہاں دے منصوبیں اچ اپنڑاں حصہ پیندے رہسن۔ انہاں آکھیا جو ایجھے بہوں منصوبے عوام سانگے بنڑیسوں ۔ وزیراعظم ملتان میٹرو پولیٹن کارپوریشن دے میئر نوید آرائیں کوں وی میئر شپ دا عہدہ سنبھالنڑ تے مبارخ ڈیندے ہوئیں توقع ظاہر کیتی جو او دل نال کم کریسن تے ملتان شہر دا نقشہ بدل ڈیسن تے اینکوں خوبصورت شہر بنڑا ڈیسن تقریب اچ وزیراعلیٰ پنجاب محمد شہباز شریف، وفاقی وزیر قومی غذائی تحفظ تے تحقیق سکندر حیات بوسن اتے میئر ملتان نوید آرائیں وی خطاب کیتا۔
