اسلام آباد (پاکستان نیوز پوائنٹ 05جنوری2016ء) وزیراعظم محمد نواز شریف عالمی برادری تے زو ر ڈتا ہے جو او مقبوضہ کشمیر اچ نہتے تے معصوم شہریاں تے بھارتی ظلم دا نوٹس گھنے اتے کشمیر دے جھیڑے کوں اقوام متحدہ دیاں قرارا دادں دے مطابق حل کراونڑ اچ اپنڑاں کردار ادا کرے ،پاکستان کشمیریاں دی سیاسی ،سفارتی تے اخلاقی حمایت جاری رکھیسی ۔او خمیس کوں اتھاں وزارت خارجہ دی سانجھ نال ینگ پارلیمنٹرین فورم دے اہمتام نال کشمیر بارے ڈو ڈینھ دی بین الاقوامی پارلیمانی سیمینار دی افتتاحی تقریب توں خطاب کریندے پے ہن ۔
وزیراعظم کشمیر دے حوالے نال عالمی پارلیمانی سیمینار دے انعقاد کوں ویلھے نال قرار ڈیندے ہوئیں کشمیر پاکستان دی شناخت دا جزو لاینفک ہے ،اسادے دل کشمیریاں دے دل دے نال دھڑکدے ہن ،اساں انہاں دی خوشی توں خوش تے انہاں دے ڈکھ اچ اساکوں وی ڈکھ لگدے ۔انہاں آکھیا جو کشمیر کوں سلگدا ہویا نی چھوڑیا ونج سگدا ۔دنیا بھارت کوں اے ڈساوے جو ہنڑ بہوں تھی گی ہے ۔
وزیراعظم آکھیا جو جدو جہد آزاد کشمیر اچ کشمیریاں دی نوجوان نسل ہک نواں باب رقم کیتا ہے ۔برہان وانی دی شہادت دے بعد کشمیریاں دی جدو جہد آزادی اچ ہک نواں ولولہ پیدا تھیا ہے ۔اے کشمیریاں دی اپنڑی جدوجہد ،پاکستان کشمیریاں دی ہمیشہ سیاسی سفارتی اخلاقی حمایت کیتی ہے اساں آئندہ وی حمایت جاری رکھیسوں تاں جو کشمیریاں دے حق خود ارادیت دے حصول ممکن تھی سگے ۔
۔وزیر اعظم آکھیا جو پاکستان ہر بین الاقوامی فورم تے مسئلہ کشمیرنشابر کریندا رہسی۔ انہاںآکھیا جو حال اچ ہی میں ارکان پارلیمان کوں باہرلے ملک اپنڑے نمائندیں دے طور تے بھجوایا ہا تاں جو دنیا کوں مقبوضہ کشمیردی عوام دی حالت زار بارے اچ ڈسایا ونج سگے۔ آزاد کشمیر دے صدر مسعود خان ، وزیر اعظم راجہ فاروق حیدر ، وزیر دفاع خواجہ محمد آصف وی تقریب اچ موجودہن جڈاں جو یورپ اتے شمالی امریکہ توں کشمیر بارے اچ دانشور وی تقریب اچ شریک ہن۔
