اسلام آباد (پاکستان پوائنٹ نیوز۔25 جولائی۔2016) وفاقی وزیر منصوبہ بندی تے ترقی احسن اقبال آکھیا ہے جو گوادر ایئرپورٹ تے ایکسپریس وے دی گراونڈ بریکنگ اجوکے سال تھیسی،ساریں توں پہلا اقتصادی زون گوادر اچ بنڑسی، چین پاکستان اقتصادی راہداری ہک سڑک دا کم نی بلکہ پورا فریم ورک ہے ،20ویں صدی اچ سیاسی نظریات دی جنگ ہئی جڈاں جو 21 ویں صدی اقتصادی نظریات دی جنگ ہے۔
اے گالھ مہاڑ انہاں سنوار کوں گوادر پریس کلب دے وفد نال ملاقات دے دوران کیتا ۔وفاقی وزیر آکھیا جو دسمبر 2016اچ گوادر کوں پورے ملک توں لنک کرنڑ سانگے ترائے رستے دستیاب تھی ویسن ۔انہاں آکھیا جو سی پیک دا ساریں توں ودھ فائدہ گوادر اتے بلوچستان کوں تھیسی ۔وفاقی وزیر آکھیا جو گوادر بنیادی ڈھانچے دے علاوہ ووکیشنل اتے ٹیکنیکل ادارے وی قائم کیتے ویسن ۔
احسن اقبال آکھیا جو ایں سال ستمبر اچ گوادر یونیورسٹی قائم کیتی ویسی، گوادر شہر کوں صرف جدید بندرگاہ نی بنڑایا ویندا پیا بلکہ اینکوں سماجی تے اقتصادی سرگرمی دا مرکز بنڑایا ویسی ۔سی پیک پاکستان اتے چین دیاں قیادتاں دے وژن دا ملاپ ہے۔انہاں آکھیا جو سی پیک دے تحت 46 ارب ڈالر اچ 35 ارب ڈالر توانائی دے شعبے تے انوسٹ کیتے ویندے پن۔ توانائی اچ ساریں توں ودھ حصہ سندھ اتے بلوچستان اچ لاتا ویندا پے ۔ احسن اقبال آکھیا جو سی پیک نال خطے دے ترائے ارب لوکاں کوں فائدہ تھیسی۔
