صدر ممنون حسین دا ایوان صدر اچ انسانی حقوق دے عالمی ڈینھ دے موقع تے تقریب توں خطاب

صدر ممنون حسین دا ایوان صدر اچ انسانی حقوق دے عالمی ڈینھ دے موقع تے تقریب توں خطاب

اسلام آباد(پاکستان نیوز پوائنٹ 10دسمبر2016ء) صدر مملکت ممنون حسین آکھیا ہے جو کشمیریاں اتے فلسطینیاں سمیت دنیا دیاں مختلف قوماں کوں انہاں دے حق خود رادیت دے بنیادی حقوق توں محروم رکھیا گیا ہے اتے انسانیت تے ظلم کیتے ویندے پن ۔اے صورت حال انسانی حقوق دی پامالی دے سلسلے کوں جنم ڈیندی ہے ،عالمی برادری کوں ایندا نوٹس گھننڑاں چاہیدا ہے ۔صدر مملکت اے گالھ ایوان صدر اچ انسانی حقوق دے عالمی ڈینھ دے موقع تے منعقد تقریب توں خطاب کریندے ہوئیں آکھی ۔

انہاں آکھیا جو انسانی حقوق دے عالمی ڈینھ سانگے نعرہ اج کہیں کوں ایندا حق ڈیواونڑ سانگے کھڑے ہوجاﺅ دا انتخاب بہوں چنگاں ہے کیوں جو اے نعرہ ایں عہد دی تجدید دی حیثیت وی رکھیندا ہے جیرھا جو مسلماناں دی حیثیت نال اساڈے عقیدے ،پاکستانی دی حیثیت آئینی تقاضے تے ہک بین الاقوامی شہری دی حیثیت نال اقوام متحدہ دے چارٹر تے انسانی حقوق دے اعلامییے دی رو نال اساں تے عائد تھیندا ہے ۔صدر مملکت آکھیا جو اج دے عہد اچ کوئی معاشرہ اپنڑی جغرافیائی حدود اچ سمٹ تے رہ نی سگدا ،بہوں سارے خارجی عوامل ڈوجھے ملکاں دے اندرونی معاملات تے اثر اندا ز تھیندے ہن ۔