اسلام آباد(پاکستان پوائنٹ نیوز۔21 جولائی۔2016) مشیر خارجہ سرتاج عزیز ہک واری ول مقبوضہ کشمیر اچ بھارتی مظالم دی مذمت کریندیں ہوئیں بھارت تے واضح کیتا جو بے گناہ کشمیریاں تے ظلم اتے قتل عام کہیں صورت قبول کائنی،کشمیر بارے عالمی رائے عامہ تکھے بدلدی پئی اے،انسانی حقوق دی خلاف ورزیاں دی تحقیقات سانگے فیکٹ فائنڈنگ مشن مقبوضہ کشمیر بھیجنڑ سانگے اقوام متحدہ نال رجوع کریسوں ،کشمیری عوام دے حق خودارادیت دے مطالبے کوں طاقت دے زور تے دباونڑ ریاستی دہشت گردی،کشمیر کوں اندرونی معاملہ قرارڈیونڑ اقوام متحدہ دی قرارداداں دی خلاف ورزی اے،سید علی گیلانی دے چار نکاتی فارمولے دی حمایت کریندوں ،جڈاں وی مذاکرات تھیے،کشمیر تے گالھ ضرور تھیسی،آزاد کشمیر دے انتخابات اچ ساری سیاسی جماعتاں حصہ گھندیاں پئن ،جڈانجو مقبوضہ کشمیر اچ آل پارٹیز کانفرنس یکا نام نہاد انتخابات دا بائیکاٹ کیتا،پاک افغان ڈی جی ایم اوز وچال ملاقات آندے مہینے کابل ا چ تھیسی۔
انہاں آکھیا جو 1990ء دی تحریک دے بعد پہلی واری مسئلہ کشمیر عالمی توجہ حاصل کیتی اے،مقبوضہ کشمیر گزریل 13ڈینھ توں بند پئے ۔اے گالھیں انہاں دفتر خارجہ اچ پریس کانفرنس کریندیں ہوئیں آکھی۔اجوکے بھارتی مظالم اتے پاکستان دی کوششاں نال کشمیر دا مسئلہ عالمی سطح تے اجاگر تھی گئے اقوام متحدہ،اوآئی سی،افریقی یونین اتے یورپی یونین سمیت بئے عالمی ادارے اتے انسانی حقوق دی تنظیماں مقبوضہ کشمیر اچ بھارتی فوج دے مظالم دی مذمت اتے انہاں دی تشویش کیتی اے۔
