اسلام آباد (پاکستان نیوز پوائنٹ 11نومبر2016ء) وفاقی وزیر دفاعی پیداوار راناتنویر حسین آکھیا ہے جو امریکہ پاکستان دے نال اسٹریٹجک پارٹنرشپ کوں بہوں اہمیت ڈیندا ہے ۔ریڈیو پاکستان نال گالھ مہاڑ کریندے ہوئیں انہاں آکھیا جو امریکہ اچ نویں صدر دا انتخاب اتے انتخابی نتائج دا معاملہ امریکہ دا اندرونی معاملہ ہے اتے ہر آونڑ آلا صدر منصب تے براجمان تھیونڑ دے بعد بئے ملکاں نال اپنڑی خارجہ پالیسی کوں ترتیب ڈیندا ہے ۔
انہاں آکھیا جو امریکہ دے افغانستان ،ایران دے حالات اتے دہشت گردی دے معاملات نال چنگی طرح باخبر ہے ،امریکہ پاکستان دے نال اسٹریٹجک پارٹنر شپ دی اہمیت توں وی آگاہ ہے اتے اینکوں اہمیت ڈیندا ہے ۔وفاقی وزیر دفاعی پیداوار آکھیا جو نویں منتخب صدر ٹرمپ مقبوضہ کشمیر اتے پاکستان دے سرحدی علاقیں نال بھارتی جارحیت توں چنگی طرح آگاہ ہن اتے ایندا ذکر او اپنڑے ہک بیان اچ وی ڈے چکیے ہن ۔
رانا تنویر آکھیا جو نویں منتخب امریکی صدر ایں حوالے نال کوئی لائحہ عمل ضرور ترتیب ڈیسن ۔انہاں ایں امید دا اظہار کیتا جو اگر امریکہ چاہوے تاں مداخلت کرتے کشمیر دامسئلہ حل کرا سگدا ہے ۔پاک امریکہ تعلقات دے حوالے نال پچھے گے سوال دے جواب اچ انہاں آکھیا جو صدر ٹرمپ دی کامیابی دے بعد بیانات انہاں دی انتخابی مہم دے خیالات توں مختلف ہن ،صدارتی قلمدان سانبھنڑ دے بعد انہاں دے رویے اچ چنگی تبدیلی امسی اتے پاکستان وی امریکہ دے نال چنگے تعلقات چاہندا ہے ۔
