اسلام آباد (پاکستان نیوز پوائنٹ 3 نومبر2016ء) سپریم کورٹ پانامہ لیکس دے حوالے نال مختلف درخواستاں دی سنڑیج7 نومبر (سنوار) تئیں ملتوی کریندے ہوئیں ہدایت کیتی ہے جو سارے فریقین اج ہی ٹی او آرز عدالت اچ جمع کراون جڈاں جو وزیراعظم محمد نواز شریف دے وکیل سلمان اسلم بٹ کو ں اپنڑے موکلاں دے حوالے نال مختصر بیان جمع کراونڑ دی ہدایت کیتی ہے۔ چیف جسٹس انور ظہیر جمالی دی سربراہی اچ پنج رکنی بنچ کیس دی سماعت کیتی۔
عدالت عظمیٰ ہک درخواست گذار طارق اسد ایڈووکیٹ ولوںدائر پٹیشن اچ فریق بنڑنڑ سانگے ہک شہری اسد کھرل ولوں دائردرخواست مسترد کرڈتی۔ عدالت آکھیا جو بیانات جمع تھیونڑ دے بعد کمیشن دا اعلان کیتا ویسی۔ جوڈیشل کمیشن ہک رکنی ہوسی جیرھا جو سپریم کورٹ دے حاضر جج تے مشتمل ہوسی اتے اینکوں سپریم کورٹ دے جج دے اختیارات حاصل ہوسن۔
