مخالفیں دے احتجاج تے دھرنیں دے باوجود حکومت اپنڑی مدت پوری کریسی ،وزیر دفاع خواجہ آصف دی سپریم کورٹ دے باہروں میڈیا نال گالھ مہاڑ

اسلام آباد (پاکستان نیوز پوائنٹ 3 نومبر2016ء) وزیردفاع خواجہ آصف آکھیا ہے جومخالفیں دے احتجاج تے دھرنیں دے باوجود حکومت اپنڑی مدت پوری کریسی ۔خمیس کوں سپریم کورٹ دے باہروں میڈیا نال گالھ مہاڑ کریندے ہوئیں انہاں آکھیا جو مخالفیں دے شو ر مچاونڑ دے با وجود پاکستان مسلم لیگ ن دی حکومت ترائے سال توں ودھ دا عرصہ گزار چکی ہے ،حکومت کوں کجھ کائنی تھیا ،حکومت کتھائیں کائنی گی تے نہ ہی کتھائیں ویندی پئی ہے ،عوامی خذمت دا سلسلہ جاری رہسی ،خواجہ آصف دا آکھنڑ ہا جو ن لیگ آلے محنت دی کمائی دی یقین رکھیندے ہن قبراں دی کمائی نی کھمدے ،انہاں آکھیا جو لیڈر کہیں وی مکتبہ فکر نال تعلق رکھیندا ہووے اپنڑے کارکناں دے نال کھڑا تھیندا ہے ،گھر اچ پش اپس لاونڑ آلے نہ بلکہ اگی تے ودھ تے ڈنڈکے کھاونڑ آلے ہی لیڈر ہوندے ہن ،ورکنگ باﺅنڈر تے بھارتی جارحیت دے پچھے گے سوال دے جواب اچ انہاں آکھیا جو وزیر اعظم دی ہدایت تے سیالکوٹ تے نارووال دے چھی قومی اسمبلی دے رکناں دی کمیٹی متاثرہ ضیان دا تخمینہ لیسی اتے گھر بار چھوڑ ونجنڑ آلیں دی رہائش تے کھاونڑ پیونڑ دا انتظام کریسی ،انہاں مزید آکھیا جو وزیراعظم نواز شریف وزیر امور کشمیر برجیس طاہر کوں وی ہدایت کیتی ہے جو کنٹرول لائن تے بھارتی جارحیت نال تھیونڑ آلے ضیان دا اندازہ لاتا ونجے ۔