اسلام آباد (پاکستان پوائنٹ نیوز 04 دسمبر 2018ء) وزیر خارجہ شاہ محمود قریشی آکھیے جو اقتصادی تعاون تنظیم سارے ممبر ریاستاں وچال سانجھے رابطے تے تعاون دا اہم ذریعہ اے، پائیدار اقتصادی ترقی دے دے حصول دی خاطر سارے رکن ملکاں وچال علاقائی تے بین الاقوامی سطح تے تعاون کوں ودھاونڑ سانگے پاکستان اپنڑاں کردار ادا کریندا رہ ویسی۔سانجھے تعاون تے تجارت دے ودھارے سانگے سارے ممبر ریاستاں متفق ہن ۔
انہاں اے گال منگل کوں اتھاں وزات خارجہ اچ اقتصادی تعاون تنظیم دے ڈینھ دے حوالے نال منعقدہ تقریب نال خطاب کریندے ہوئیں آکھی۔تقریب اچ اقتصادی تعاون تنظیم دے رکن ملکاں دے سفیراں تے مندوبین شرکت کیتی ۔ وزیرخارجہ اقتصادی تعاون تنظیم دے ڈینھ دی تقریب اچ شریک رکن ملکاں دے سفیراں ، نمائندیں، اتے مندوبین کو ں خوش آمدید اکھیندے ہوئیں آکھیا جو پاکستان گزریل سال پہلی واری ای سی او ڈے منائے اتے ہنڑ اساں ایں ڈینھ کوں سالانہ بنیاداں تے باقاعدگی نال منیندے رہسوں ۔
انہاں آکھیا اقتصادی تعاون دی تنظیم سارے ممبر ریاستاں وچال سانجھے رابطے تے تعاون دا اہم ذریعہ اے سانجھی تجارت دے ودھارے سانگے ریل ، روڈز اتے بندر گاہیں دے نال نال جدید ٹیکنالوجی دے ذریعے رابطے کوں ودھایا ونج سگدے ۔انہاں آکھیا ای سی او اچ علاقائی امن تے ترقی کوں ساریں توں ودھ اہمیت ڈتی ویندی اے جیرھا جو دور جدید دی ہک اہم ضرورت اے ۔
اے اساڈی سانجھی ذمے واری اے جو انہاں سارے مقاصد کوں حاصل کروں جیرھے جو پہلے ڈینھ توں ہی اقتصادی تعاون تنظیم دے بنیادی فریم ورک اچ شامل ہن ۔ضرورت ایں گال دی اے جو ایجھے اقدامات کیتے ونجن جیں نال مختلف سطح تے رکن ملکاں دے عوام وچال رابطے تے تعاون کوں وی ودھایا ونجے۔ وزیرخارجہ آکھیا جو ای سی او ہک ایجھا بلاک اے جیرھا جو جغرافیائی لحاظ نال جنوبی ایشیا ساریں کوں کٹھا کریندے ۔
