لاہور(پاکستان پوائنٹ نیوز 21 مئی 2018ء) لاہور دی احتساب عدالت آشیانہ ہاوسنگ اسکینڈل کیس اچ گر فتار سابق ڈی جی ایل ڈی اے احد چیمہ اتے نجی کمپنی دے مالک شاہد شفیق کوں 15ڈینھ دے جوڈیشل ریمانڈ اُتے جیل بھیج ڈتے ، احتساب عدالت دے جج سید نجم الحسن سوموار کوںمقدمے دی سماعت کیتی، دوران سماعت نیب حکام ولوں سابق ڈی جی ایل ڈی اے احد چیمہ، نجی کمپنی دے مالک شاہد شفیق کوں ترائے ڈینھ دے جسمانی ریمانڈ مُکنڑ تے عدالت دے اگوں پیش کیتا ، دوران سماعت نیب پراسکیوٹر عدالت کوں ڈسایا جو نجی کمپنی دے مالک شاہد شفیق تفتیش مکمل کرگھدی جیندے اُتے عدالت شاہد شفیق کوں 15ڈینھ دے جوڈیشنل ریمانڈ اُتے جیل بھیج ڈتا۔
دوران سماعت نیب پراسیکیوشن عدالت کوں ڈسایا جو سابق ڈی جی ایل ڈی اے احد چیمہ دے خلاف آمدن توں ودھ اثاثہ جات بنڑاونڑ دے وی ثبوت ملے ہن جنہاں دی تفتیش کیتی ویندی پئی ہے ، نیب پراسیکوشن عدالت کوں ڈسایا جو احد چیمہ دی ذال صائمہ احد دے ناں 21 کنال 4 مرلہ زمین پیراگون اچ مُل گھدی گئی ہے جیندی مالیت 7 کروڑ روپے ہے۔نیب پروسکیوٹر عدالت کوں ڈسایا جو دوران تفتیش انکشاف تھئے جو ملزم احد چیمہ کولوں پنجاب کالج ڈیرہ غازی خان اچ 4 کروڑ دی سرمایہ کاری کیتی گئی اتے اسلام آباد اچ فلیٹ وی مُل گھدے گئے جڈانجو لیپ ٹاپ توں کوڈ ورڈز اچ ٹرانزیکشن وی تھئی ۔
احد چیمہ کولوں کروڑاں روپے نکلے ہن جڈانجو بئی تفتیش کیتے احد چیمہ کوں 15ڈینھ دے جسمانی ریمانڈ اُتے نیب دے حوالے کیتا ونجے ۔ احد چیمہ دے وکیل دلائل ڈتے جو 90ڈینھ دے ریمانڈ دے باجود نیب حکام کئی ٹھوس ثبوت پیش کائنی کر سگے جیندے پاروں آمدن توں ودھ اثاثہ جات دا مقدمہ بنڑا تے ریمانڈ منگیا ویندا پئے جیہڑا جو غیر قنونی ہے۔عدالت ڈوہاہئیں پاسوں دلائل مکمل تھیونڑ دے بعد نیب دی جسمانی ریمانڈ دی درخواست مسترد کریندے ہوئیں احد چیمہ کوں 15ڈینھ جوڈیشنل ریمانڈ اُتے جیل بھجواڈتا۔
