اسلام آباد (پاکستان پوائنٹ نیوز 16 مئی 2018ء) سپیکر قومی اسمبلی سردار ایاز صادق آکھیے جو ہر ادارے کوں اپنڑے دائرہ کار اچ رہندے ہوئیں کم کرنڑاں چاہیدے ،وفاداریاں تبدیل کرنڑ آلیاں جماعتاں دے نال وفادار کائنی تاں ملک دے وفادار کیویں رہسن ،پارلیمنٹ اچ اگر اساں کھینچا تانی کریسوں تاں ایندے نتیجے چنگے کائناں رہسن ۔ڈو ترائے شفاف الیکشن تھی گے تاں مزید بہتری آویسی ،پارٹیاں دے اندر جمہوری طرز اوں وقت مضبوط تھیسی جڈاں لوک شخصیت دی بجائے منشور کوں سامنڑے رکھ تے پارٹیاں کوں ووٹ ڈیسن ۔
بدھ کوں پارلیمنٹری رپورٹرز ایسوسی ایشن (پی آر اے) ولوں اپنڑے اعزاز اچ ڈتے گے استقبالیے نال خطاب کریندے ہوئیں سپیکر سردار ایاز صادق آکھیا جو 1977ءدے بعد موجودہ دور اچ ساریں توں اہم قانون سازی تھی اے ۔2013توں 2018تئیں ملک دی 14ویں قومی اسمبلی 136بل منظور کیتن تے 49نویں قانون بنڑائے ہن ،انہاں اچ ساریں توں اہم قانون سازی قرآن پاک دی لازمی تعلیم دا بل اے ۔
ایندے علاوہ الیکشن ایکٹ ،اطلاعات تئیں رسائی سمیت بئی اہم قانون سازی کیتی گی ۔انہاں آکھیا جو چار آئینی ترمیماں منظور کیتیاں گن ،جیں اچ ڈو دا تعلق انسداد دہشت گردی تے ڈو دا تعلق انتخابی قانون نال اے ۔16پرائیویٹ ممبر بل منظور تھے ہن ۔انہاں آکھیا دھرنیں دے زمانے اچ پی ٹی آئی دے استعفے دے وقت انہاں آئین ،قانون تے عدلیہ دے فیصلے کوں سامنڑے رکھ تے فیصلہ کیتا ۔
14ویں قومی اسمبلی کوں چھی بجٹ منظور کرنڑ دا اعزا ز حاصل تھے ۔انہاں آکھیا قومی اسمبلی پورے سال دا بجٹ ایں سانگے پیش کیتے کیوں جو ایندے اچ دفاعی خرچے تے تنخواہیں نال ٹیکساں دی کٹوتی سمیت اہم معاملات ہن ۔انہاں آکھیا میکوں حکومت ولوں مطمئن کیتا گے ۔ انہاں آکھیا جو قومی سلامتی دے امور دی نگرانی سانگے اپوزیشن دے مطالبے تے انہاں دی سربراہی اچ پارلیمنٹ دی خصوصی کمیٹی بنڑائی گی اے ۔
34کمیٹیاں اچوں ڈاہ کمیٹیاں دے چیئر مین دا تعلق اپوزیشن تے جڈاں جو باقی کمیٹیاں دے چیئر مین حکومت توں ہن ۔ پی اے سی دے چیئرمین دا عہدہ اپوزیشن لیڈر کو ں ڈتا گیا ۔ انہاں آکھیا ایندے توں پہلے پارلیمنٹری سٹڈیز دا کوئی تصورکائناں ہئی اساں مختلف یونیورسٹیاں نال گال کرتے 17 یونیورسٹیاں اچ پارلیمنٹری سٹڈیز دا مضمون شامل کرایا۔ قومی اسمبلی سیکرٹریٹ توں ہنڑ تئیں 500 توں ودھ بال انٹرن شپ تے گن ۔ پپس کو ںٹرانسفارم کرتے بہتر ادارہ بنڑایا ۔ انہاں آکھیا 53 دولت مشترکہ ملکاں دے نال ان ہاﺅس ٹریننگ دا معاہد ہ تھے ۔انہاں آکھیا اساکوں پوری شفافیت دے پاسے ونجنڑاں ہوسی ۔اساکوں او گال کرنڑیں چاہیدی اے یا او چیز دی حمایت کرنڑیں چاہیدی اے جیرھی ملک سانگے بہتر ہووے ۔
