اسلام آباد (پاکستان نیوز پوائنٹ 20ستمبر 2016ء) وفاقی وزیر دفاع خواجہ آصف نال ترکش بری فوج دے کمانڈر جنرل صالح ذکی منگل کوں اتھاں ملاقات کیتی۔وفاقی وزیر دفاع خواجہ محمد آصف پاکستان اتے ترکی وچال مثالی اتے برادرانہ تعلقات کوں سراہیا۔ملاقات اچ دفاع دے شعبے اچ تعاون بئیا ودھاونڑ ،آپسی دلچسپی،انتہا پسندی،دہشت گردی اتے سرحد پار پناہ گزیناں دی واپسی سمیت بئے معاملیاں تے غور کیتا گئیا۔
ڈوہاں ملکاں انہاں چیلنجز نال نبڑنڑ سانگے سانجھی کوششاں تے وی اتفاق کیتا۔وزیر دفاع خواجہ آصف دہشت گردی دے خلاف پاک فوج دے ضرب عضب اتے ساری سیاسی جماعتاں دی مشورے نال بنڑائے گئے نیشنل ایکشن پلان تے عملدرآمد بارے ڈسایا۔انہاں تربیت سانگے ٹرینٹر 37ایئر کرافٹ مفت ڈیونڑ تے ترکی دی حکومت دا شکریہ ادا کیتا۔انہاں ترکی کوں پیش کش کیتی جو سپر مشاق طیارے ترکی کوں ویچیے ونج سگدن۔وزیر دفاع خواجہ آصف ' ترکی کوں پاکستان دی دفاعی نمائش آئیڈیاز 2017اچ شریک تھیونڑ دی باقاعدہ دعوت ڈتی۔
