اسلام آباد (پاکستان نیوز پوائنٹ 17ستمبر 2016ء) وزیر اعظم محمد نواز شریف سال دے بہوں اہم غیر ملکی دورے اُتے چھنڑ چھنڑ دی سویل نیو یارک روانہ تھی گئے ہن جتھاں او اقوام متحدہ دی جنرل اسمبلی دے 71 ویں اجلاس اچ شرکت کریسن۔آپنڑیں تریجھے دور اقتدار اچ وزیر اعظم 193 رکنی عالمی فورم نال چوتھا خطاب کریسن، توقع ہے جو وزیر اعظم 21 ستمبر کوں جنرل اسمبلی نال خطاب کریسن ، جیندے اچ او اہم علاقائی اتے عالمی اموراُتے پاکستان دے نقطہ نظر دی وضاحت کریسن اتے انہاں دے خطاب اچ بھارتی مقبوضہ کشمیر دی صورتحال تے وی خصوصی روشنی پاتی ویسی ۔
وزیر اعظم ہائوس توں جاری بیان دے مطابق دورہ نیو یارک اچ وزیر اعظم دا شیڈول بہوں مصروف ہوسی ۔ اقوام متحدہ دی جنرل اسمبلی دے اجلاس اچ شرکت دے نال نال وزیر اعظم اقوام متحدہ دے سیکریٹری جنرل سمیت کئی عالمی رہنماواں نال وی ڈو طرفہ ملاقاتاں کریسن۔ دورہ نیو یارک اچ وزیر اعظم دے نال امور خارجہ دے مشیر سرتاج عزیر اتے بئے اعلی حکام وی ہوسن۔
وزیر اعظم محمد نواز شریف جنرل اسمبلی توں خطاب دے نال نال اقوام متحدہ دے فورم اُتے مہاجرین دے عالمی بحران بارے پالیسی بیان وی ڈیسن۔ ایں سال جنرل اسمبلی دا اجلاس بھارتی مقبوضہ کشمیر اچ غاصب بھارتی فوج ولوں انسانی حقوق دیاں سنگین خلاف ورزیاں اتے معصوم ہتھوں خالی کشمیریاں تے ڈھائے ونجنڑآلے بھارتی مظالم بارے منعقد کیتا ویندا پئے ۔
مقبوضہ کشمیر اچ بھارتی تسلط اتے انسانی حقوق دیاں خلاف ورزیاں عالمی توجہ دا مرکز ہن اتے خاص طور تے وزیر اعظم ولوں اقوام متحدہ دے سیکریٹری جنرل کوں لکھے گئے ڈو خطاں دے بعد مسئلہ کشمیر خصوصی عالمی توجہ دا مرکز ہے ۔ انہاں خطاں اچ وزیر اعظم کشمیر دے تنازعے دے خاتمی سانگے اقوام متحدہ دیاں قرارداداں اُتے عمل درآمد کوں یقینی بنڑاونڑ اتے مقبوضہ وادی اچ بھارتی افواج ولوں انسانی حقوق دیاں خلاف ورزیاں کوں مکاونڑ دا مطالبہ کیتا ہئی ۔
وزیر اعظم عالمی برادری اتے اقوام متحدہ اُتے زور ڈتے جو او اقوام متحدہ دیاں قرارداداں اتے آپنڑیں وعدیاں دے مطابق مقبوضہ جموں تے کشمیر دے لوکیں دے حق خود ارادی بارے آپنڑاں کردار ادا کرن۔ اقوام متحدہ دے انسانی حقوق دے ہائی کمشنر زید راعد الحسین بھارت توں مطالبہ کیتے جو او مقبوضہ وادی اچ انسانی حقوق دیاں خلاف ورزیاں بارے تحقیقات کیتے اقوام متحدہ دے فیکٹ فائینڈنگ مشن کوں کشمیر ونجنڑ دی اجازت ڈیوے ۔
وزیر اعظم اقوام متحدہ تے زور ڈتے جو او مقبوضہ کشمیر اچ انسانی حقوق دیاں خلاف ورزیاں اتے سنگین جرائم کوں مکاونڑ سانگے آپنڑاں بھرپور کردار ادا کرے ۔ توقع ہے جو آپنڑیں خطاب اچ وزیر اعظم عالمی برادری نال اقوام متحدہ دے ایجنڈے دے ساریاں توں پرانڑیں اتے دیرینہ حل طلب مسئلے کوں مکاونڑ سانگے معاونت داوی مطالبہ کریسن۔ نیو یارک اچ آپنڑیں مصروفیات دے دوران وزیر اعظم محمد نواز شریف یو ایس پاکستان بزنس کونسل اتے یو ایس چیمبر آف کامرس دے زیر انتظام تھیونڑآلیاں مختلف تقریبات اچ کاروباری اتے تاجر برادری نال وی خطاب کریسن۔
