اسلام آباد (پاکستان نیوز پوائنٹ 10ستمبر 2016ء) عالمی امور دے ماہر اتے معروف تجزیہ کار ظفر اقبال چیمہ آکھے جو پاکستان دے اندونی مسلیاں دے حل سانگے لازمی ہے جو افغان مہاجرین کوں مرحلہ وار افغانستان واپس بھیجا ونجے ۔ ریڈیو پاکستاں نال گالھ مہاڑ کریندے ہوئیں انہاں آکھیا جو گزریل ڈینھ وفاقی کابینہ دے اجلاس اچ افغان مہاجرین دی پاکستان اچ رجسٹریشن اتے رہائش کیتے 31 مارچ 2017تئیں دی توسیع دا فیصلہ تھئے ۔
انہاں آکھیا جو پاکستان ولوں صرف غریب اتے تلویں درجے دے مہاجرین کو ںافغانستان بھیجنڑ دا فیصلہ کیتا ویندا پئے اتے افغانستان ایں پوزیشن اچ کائنی جو او غریب افغانیاں کوں سنبھال سگے ۔ انہاں آکھیا جو واپس ونجنڑآلے مہاجرین کیتے خوراک اتے رہائش سمیت کئی مسلیاں تے افغان حکومت کو ںتحفظات ہن ۔ ڈاکٹر اقبال آکھیا جو ایں گالھ دا ڈر ہے جو افغان حکومت پاکستاں حکومت کوں براہ راست یا کہیں عالمی ایجنسی دے ذریعے درخواست کروائے جو مہاجرین کوں پاکستان اچ بیا راہونڑ دی مہلت ڈتی ونجے ۔
انہاں پاکستان دے مسلیاں بارے ہک سوال دے جواب اچ آکھیا جو پاکستان کوں دہشتگردی ،انتہا پسندی،مہنگائی اتے بے روزگاری سمیت کئی مسلیاں داسامنڑاں ہے جیندے کیتے ضروری ہے جو اتھاں موجود افغان مہا جرین کو ں مرحلہ وار واپس بھیجا ونجے ۔ انھاں پاکستان دے مسلیاں آلے پاسے اشارہ کریندے ہوئیں آکھیا جو اتھاں موجود بہوں سارے افغانیاں پاک قومی شناختی کارڈ نبڑوا گھدے ہن جیہڑا جو غیر اخلاقی اتے قابل تشویش گالھ ہے ۔ انھاں آکھیا جو مہاجرین دے ونجنڑ دے بعد پاکستان دی معیشت تے بئے چنگے اثرات امسن۔
