ڈو طرفہ تجارت اچ ودھارے سانگے ٹیکسٹائل، زرعی مشینری،

فارماسیوٹیکل دے شعبیاں اچ گانڈھا ودھایا ویسی وزیراعظم محمد نوازشریف دی سینیگال دے صدر مکی سال نال ملاقات اچ گالھ مہاڑاسلام آباد اچ سینیگال دا سفارتخانہ کھولنڑ کیتے فیصلے دا خیر مقدم

ڈو طرفہ تجارت اچ ودھارے سانگے ٹیکسٹائل، زرعی مشینری،
فارماسیوٹیکل دے شعبیاں اچ گانڈھا ودھایا ویسی وزیراعظم محمد نوازشریف دی سینیگال دے صدر مکی سال نال ملاقات اچ گالھ مہاڑاسلام آباد اچ سینیگال دا سفارتخانہ کھولنڑ کیتے فیصلے دا خیر مقدم

اسلام آباد (پاکستان نیوز پوائنٹ 06ستمبر 2016ء) وزیراعظم محمد نوازشریف سینیگال نال ڈو طرفہ تجارت ودھاونڑ کیتے ٹیکسٹائل، زرعی مشینری اتے فارماسیوٹیکل دے شعبیاں اچ تعاون اچ ودھارے تے زور ڈتے ۔ منگل کوں اتھاں وزیراعظم ہائوس ا چ سینیگال دے صدر مکی سال نال کلہیں ملاقات اچ وزیراعظم سالانہ ڈو طرفہ تجارت دے موجودہ حجم 30.469 ملین ڈالر کوں ایند ی حقیقی صلاحیت دے حوالے نال ودھاونڑ تے زور ڈتے ۔

وزیراعظم نوازشریف آکھے جو سینیگال پاکستان دیاں مصنوعات بشمول چمڑا، نِکی انجینئرنگ دے سامان توں فیدہ چاون۔ انہاں آکھیا جو ایں بارے وزیر تجارت دی سربراہی اچ ہک تجارتی اتے سرمایہ کاری وفد سینیگال دا دورہ کر سگدے ۔ وزیراعظم آکھے جو پاکستان سینیگال اچ ہک پاکستانی بینک کھولنڑ دا وی جائزہ گھندا پئے ۔ جیندے نال ڈوہائیں ملکاں وچال تجارت اتے سرمایہ کاری اچ سہولت ملسی۔

انہاں آکھیا جو گزریل سال نیویارک اچ اقوام متحدہ دی جنرل اسمبلی دے سیشن دے موقعے تے سینیگال دے صدر مکی سال نال آپنڑیں ملاقات دا حوالہ ڈتا جتھاں ڈوہائیں اگوانڑاں مختلف شعبیاں اچ تعاون اچ ودھارے تے اتفاق کیتا۔ وزیراعظم نوازشریف سال 2016-17ء کیتے اقوام متحدہ دی سلامتی کونسل دا غیر مستقل رکن بنڑنڑ دے سلسلے اچ سینیگال کو ںمنتخب کیتے ونجنڑ تے سینیگال دے صدر کوں مبارخ ڈتی اتے امید کیتی جو سینیگال اسلامی ملکاں دے مفاد دے تحفظ اتے ودھارے کیتے ہک فعال کردار ادا کریسی۔

انہاں سینیگال اچ 2012ء اچ عام انتخابات دے بعد جمہوریت کوں یقینی بنڑاونڑ تے سینیگال دے صدر دی تعریف کیتی اتے علاقائی مسلیاں دے حل کیتے انہاں دی مثبت کردار دا ذکر کیتا۔ وزیراعظم نوازشریف اسلام آباد اچ سینیگال دا سفارتخانہ کھولنڑ بارے سینیگال دے صدر دے فیصلے دا خیر مقدم کیتا اتے آکھیا جو ایندے نال ڈوہائیں ملکاں وچال تعاون بیا مستحکم تھیسی ۔ ڈوہائیں ملکاں دفاعی شعبے اتے دفاعی خریداری اچ تعاون دا وی جائزہ گھدا۔