لاہور(پاکستان نیوزپوائنٹ15جنوری2018ء) لاہور ہائیکورٹ دے چیف جسٹس سید منصور علی شاہ دی سربراہی اچ ڈو رکنی بنچ قصور اچ نکی بالڑی زینب دے قاتل دی گرفتاری کیتے آئی جی پنجاب کو ں24گھنٹے دی مزید مہلت ڈے ڈتی تے زیادتی دی شکارہک ڈوجھی بالڑی کائنات تے بتول کو طبی امدا د دی فراہمی دا حکم ڈیندے ہوئیں آندی سماعت تے آئی جی پنجاب تے جے آئی ٹی دے سربراہ کوں عدالت اچ ذاتی حیثیت نال سڈ گھدا ۔
عدالتی سماعت دے موقع تے آئی جی پنجاب قصور اچ مصروفیت دی بناءتے عدالت پیش نہ تھے، ایڈیشنل آئی جی پنجاب آئی جی پنجاب ولوں عدالت اچ رپورٹ پیش کیتی،انہاں آکھیا جو زینب دے ملزم دی گرفتاری کیتے تفتیشی ٹیماں بنڑا ڈتیاں گن تے وختی ملزم تئیںپج ویسوں ،انہاں عدالت کوں ڈسایا جو پنجاب اچ گزریل ڈو سالاں اچ ڈاہ سال توں گھٹ عمر دیاں بالڑیں نال زیادتی دے تیرہ سو 40واقعے تھے ہن ،قصور شہراچ ڈو سالاں دے دوران گھٹ عمر دیاں بالڑیاں کوں جنسی تشدد دا نشانہ بنڑایا گیا ، آئی جی دی رپورٹ اچ آکھیا گے جو زینب دا قتل کرنڑ آلا سیریل کلر ہے ،زینب دا قتل ہوں بندے کیتے جیں پہلے ست بالڑیاں نال زیادتی کیتی تے انہاں کوں قتل کیتا ،ڈی جی فرانزک سائنس لیبارٹری عدالت کوں ڈسایا جوگزریل چھی ڈینہاں اچ 11 سوتوں پچھ گچھ کیتی گی ،چھیانوے لوکاں دے ڈی این اے دے نمونے گھدے گن ،چیف جسٹس ریمارکس ڈیندے ہوئیں آکھیا ہے جو سارے بال سانجھے ہن اگر پہلے سنجیدہ اقدام ہوندا تاں زینب دے نال اے افسوسناک واقعہ پیش نہ آندا ، عدالت قصور اچ ڈو چائلڈ کورٹس تشکیل ڈیندے ہوئیں بالاں نال زیادتی دے مقدمیں روزانہ دی بنیاد تے نبیڑنڑ دی ہدایت کر ڈتی ۔
عدالت قصور اچ جنسی زیادتی دی شکار ہک بئی متاثرہ بالڑی کائنات دا پورا علاج کرواونڑ دا حکم ڈے ڈتا ،عدالت کیس دی سماعت 17جنوری تئیں ملتوی کریندے ہوئیں آندی سماعت تے آئی جی پنجاب،جے آئی ٹی دے سربراہ،سیکرٹری صحت پنجاب اتے سیکرٹری ایجوکیشن کوں ذاتی حیثیت اچ سڈ گھدے۔
