اسلام آباد (پاکستان نیوزپوائنٹ21نومبر2017ء) وفاقی وزیرداخلہ، منصوبہ بندی، ترقی تے اصلاحات پروفیسر احسن اقبال آکھیا ہے جو پاکستان اچ تھیونڑ آلی سانجھی تعاون کمیٹی دا انعقاد اقتصادی راہداری سانگے سنگ میل دی حیثیت رکھیندا ہے ،لمبی مدت دے منصوبہ ڈو پاسے اقتصادی تعاون کوں نویں جہت دا سامنڑاں کرویسی ،پاکستان دے عوام چینی حکومت تے چینی عوام دے پاکستان سانگے جذبہ خیر سگالی تے ودھ سارے تعاون کوں قدر دی نگاہ نال ڈیکھدے ہن ،اقتصادی راہداری دے شروع دے منصوبے اپنڑی تکمیل دے اہم مرحلے اچ داخل تھی گے ہن ۔
انہاں خیالاں دا اظہار انہاں منگل کوں ستویں سانجھی تعاون کمیٹی دے ڈوجھے ڈینھ اجلاس توں خطاب کریندے ہوئیںکیتا ،وفاقی وزیر آکھیا جو سانجھی تعاون کمیٹی دا اجلاس ایں سانگے تاریخی اہمیت رکھیندے جو ایں اچ ڈوہیں ملکاں وچال اقتصادی تعاون دے لمبی مدت دے منصوبے کوں چھیکڑی شکل ڈے تے منظوری سانگے پیش کیتا ویندا پیا ہے ۔انہاں آکھیا جو لمبی مدت دے منصوبیں دی منظوری نال پاکستان تے چین وچال اقتصادی تعاون کوں مختلف شعبے تئیں ودھاونڑ اچ مدد مل ویسی ۔پاکستان تے چین وچال اقتصادی تعاون دے نال نال سماجی رابطے کوں وی وسعت تے نویں بلندی ملی ہے ۔
