اسلام آباد (پاکستان نیوزپوائنٹ12اکتوبر2017ء) قومی احتساب بیورو دے چیئرمین جسٹس جاوید اقبال آکھیا ہے جو شیشے نال بنڑی خوبصورت بلڈنگ اچ بیٹھے ہوئے ایں ویلھے تئیں ملک توں بد عنوانی دا خاتمہ کائناں تھیسی جڈاں تئیں نیب دے افسرتے اہلکار اپنڑے فرائض ایمانداری ،شفافیت تے میرٹ تے قانون تے اللہ سئیں تے پکے ایمان دے نال بد عنوانی دے خاتمے سانگے زیرو ٹالرنس دی پالیسی کائناں بنڑیسن ۔
انہاں خیالاں دا اظہار انہاں نیب ہیڈ کوارٹر تے نیب راولپنڈی دے افسراں توں اپنڑے عہدے دا چارج سنبھالنڑ دے بعد خطاب کریندے ہوئیں کیتا ۔انہاں آکھیا جو نیب دی ساکھ کوں بحال کرنڑ سانگے ” احتساب ساریں دا “ دے اصول تے عمل کیتا ویسی تے انکوائریاں تے تحقیقات سالاں دی بجائے ہنڑ قانون دے مطابق مقر ر وقت دے اندر نہ صرف پوریاں کیتیاں ونجن بلکہ معزز احتساب عدالتاں ،ہائی کورٹس تے سپریم کورٹ آف پاکستان اچ نیب ولوں دائر ریفرنسز دی موثر پیروی دے علاوہ نیب دا موقف قانو ن تے شواہد دے مطابق معزز عدالتاں دے سامنڑے پیش کیتا ویسی ،جیں نال بد عنوان عناصر کوں کیفر کردار تئیں پجایا ویسی انہاں توں لٹیاں ہویاں رقماں بر آمد کرنڑ اچ مدد مل ویسی ۔
انہاں آکھیا جو میں ساری زندگی قانون تے انصاف دے مطابق فیصلے کیتے ہن تے کہیں توں ڈکٹیشن کائنی گھدی نہ ہی گھنساں ۔نیب دے سارے افسر اپنڑاں کم دیانتداری تے محنت نال تے بغیر کہیں دباﺅ دے کرن ۔
