ڈیرہ بگٹی/اسلام آباد (پاکستان نیوزپوائنٹ14ستمبر2017ء) وزیراعظم شاہد خاقان عباسی آکھیا ہے جو بلوچستان دا مستقبل صوبے دے عوام دے ہتھاں اچہے ، او ویلھا پرے کائنی جڈاں بلوچستان ملک دا میر ترین صوبہ ہوسی ، بلوچستان اچ 455 ارب روپے سڑکاں دے منصوبیں تے خرچ تھیسن ، ہر ضلعی ہیڈ کوارٹرز کوں گیس ڈتی ویسی ، وفاقی حکومت دی مدد نال صوبے اچ 21 یونیورسٹیاں قائم تھیندیاںپن، ناراض بلوچ بھرا گمراہ کن پروپیگنڈے دی بجائے صوبے اتے عوام دی تعمیر تے ترقی اچ حصہ گھنن۔
محمد نواز شریف دے دوراچ بجلی دے تاریخ ساز منصوبے لگے ہن جیں دے ثمرات بلوچستان کوں مل ویسن ساریں توں قیمتی وسیلہ پانڑیں ہے جیں کوں ماضی اچ نظر انداز کر ڈتا گیا ۔پانڑیں دے معاملے کوںڈیکھنڑ سانگے ملک اچ انجھ وزارت قائم کیتی گی ۔سپریم کورٹ دے 28جولائی دے فیصلے نال اتفاق کائنی لیکن احترام کریندوں ،ڈیرہ بگٹی آندے انتخابات اچ مسلم لیگ ن دا گڑھ ثابت تھیسی ۔
ڈیرہ بگٹی دے عوام نال وعدہ ہے جو انہاں دے مسئلے ترجیحی بنیاداں تے حل کیتے ویسن ۔انہاں خیالاں دا اظہار وزیراعظم خمیس کوں ڈیرہ بگٹی اچ کچھی کینال منصوبے دا افتاح کرنڑ دے بعد اجتماع توں خطاب کریندے ہوئیں کیتا ۔ایں موقع تے وزیر داخلہ احسن اقبال، وفاقی وزیر سیفران عبدالقادر بلوچ، وزیر آبی وسائل سید جاوید علی شاہ، وزیر مملکت پٹرولیم جام کمال، وزیر مملکت آبی وسائل دوستین خان ڈومکی، وزیراعلیٰ بلوچستان سردار ثناءاﷲ خان زہری، سینیٹر سردار یعقوب ناصر، رکن قومی اسمبلی خالد حسین مگسی، چیئرمین واپڈا، بلوچستان دے صوبائی وزیر تے سینئر حکام موجود ہن ۔
وزیرا عظم شاہد خاقان عباسی آکھیا جو حق تاں اے ہے جو اج اتھاں محمد نوازشریف کوں ہوونڑاں چاہیدا ہئی کیوں جو اے منصوبہ انہاں دا منصوبہ ہے ،1998اچ انہاں ایندی بنیاد رکھی تے اج 2017اچ ایندا منڈھ بدھیا ہے ۔بہوں سارے لوکاں آکھیا ہے جو اے کیجھا منصوبہ ہے جو فی ایکڑ تے وفاقی حکومت 11لکھ روپے خرچ کریندی پئی ہے ،اے کوئی معمولی منصوبہ کائنی ،80ارب روپے ایندے تے خرچ تھے ہن ۔
انہاں آکھیا جو اے منصوبہ 2002اچ شروع تھیا لیکن ایندے تے توجہ کائنی ڈتی گی ۔تے ایں دوران آمریت دا ہک لمبا دور گزر گیا جڈاں پی پی پی دی حکومت آئی تاں انہاں دے پنج سال گذریے لیکن کہیں پیسے نہ ڈتے اے منصوبہ پورا تھی سگے ۔نواز شریف منصوبے کوں اگی تے ودھایا تے ایں سانگے فنڈ ڈتے تے اج الحمد اللہ منصوبہ تساں دے سامنڑے ہے تے اے منصوبہ ڈیرہ بگٹی دے عوام دے تقدیر بدال ڈیسی ۔
انہاں آکھیا جو مسلم لیگ ن صرف گالھیں نی کریندی کم کریندی ہے عوام دے مسئلے حل کریندی ہے ۔بلوچستان دا مستقبل بلوچستان دے عوام دے ہتھاں اچ ہے ۔اے منصوبہ ڈو صوبیں وچال ہک محبت دا عکاس ہے ۔منصوبے دے تحت 300کلومیٹر نہر پنجاب توں گزردی ہے لیکن پانڑیں بلوچستان سانگے آندا ہے ۔ڈیرہ بگٹی تے سوئی سانگے پیونڑ دے پانڑیں تے گیس دے مسئلے دے حوالے نال وزیراعظم آکھیا جو اے مسئلہ تساں دا نی اساڈا مسئلہ ہے اینکوں مستقل طور تے حل کیتا ویسی ۔
وزیراعظم آکھیا جو اساڈا وعدہ ہے جو تساڈے مسئلے حل کیتے ویسن تے پاکستان کوں تعمیر تے ترقی دے جیں رستے تے ٹوریا ہے ،ملک اچ جمہوریت کوں ودھارا ڈتا ہے تے اینکوں اگی تے ودھا ڈیسوں ۔ایندے توںپہلے چیئرمین واپڈا لیفٹیننٹ جنرل (ر) مزمل حسین وزیراعظم کو ںکچھی کینال منصوبے بارے اچ بریفنگ ڈتی۔
