اسلام آباد (پاکستان نیوزپوائنٹ13ستمبر2017ء) قومی اسمبلی قومی کمیشن اطفال بل 2017دی منظوری ڈے ڈتی ہے ۔ بدھ کوں قومی اسمبلی اچ وفاقی وزیر ممتاز احمد تارڑ تحریک پیش کیتی جو قومی کمیشن اطفال بل 2017تے غور کیتا ونجے۔ ڈاکٹر شیریں مزاری آکھیا جو اے اہم بل ہے تاں جو اے خود مختار کمیشن ہوونڑاں چاہیدا ہے ۔موجودہ صورت اچ بل ناقابل قبول ہے ایندی اچ جلد بازی نہ کیتی ونجے ۔
ڈاکٹر نفیسہ شاہ آکھیا جو پاکستان اچ بالاں دے حقوق دے حوالے نال 1990اچ اقوام متحدہ دے کنونشن تے دستخط کیتے ہن ۔تقریبا 30سال بعد بل لاتا ویندا پیا ہے ۔چنگی گالھ ہے تاں جو اساں آزاد کمیشن چاہندوں حکومتی کمیشن بنڑاونڑ تے اساکوں اعتراض ہے ۔ڈاکٹر عارف علوی آکھیا جو پاکستان دے قانون دے تحت بال اینکوں قرار ڈتا ویندا ہے جیں دی عمر شادی دی نہ ہووے ۔
وزیر قانون زاہد حامد آکھیا جو اے بل قومی اسمبلی توں پہلے منظور تھی گیا ہے ۔سینیٹ توں منظور تھی تے ترمیم دے نال آیا ہے ۔اگر نویں ترمیم لاونڑ چاہندوں تاں سینیٹ دی ترمیم منظور کائنی تاں اے ولا پارلیمنٹ دے سانجھے اجلاس اچ ویسی ۔قومی اسمبلی بل تے غور دی منظوری ڈے ڈتی ۔ایندے بعد سپیکر بل دی ہک شق دے بعد بئی دی ایوان توں منطوری حاصل کیتی ۔انسانی حقوق دے وزیر ممتاز احمد تارڑ تحریک پیش کیتی قومی کمیشن برائے حقوق اطفال بل 2017منظوری کیتا ونجے ۔قومی اسمبلی بل دی منظوری ڈے ڈتی ۔
