اسلام آباد (پاکستان نیوزپوائنٹ 24جولائی2017ء) وزیراعظم محمد نواز شریف مالدیپ دے صدر عبداﷲ یامین عبدالقیوم دی دعوت تے 25 توں 27 جولائی تئیں جمہوریہ مالدیپ دا سرکاری دورہ کریسن۔او مالدیپ دے 52 ویں یوم آزادی دی تقریبات اچ مہمان خصوصی ہوسن جیرھا جو26 جولائی کوںتھیسی۔ سنوار کوں دفتر خارجہ ولوں جاری بیان دے مطابق وزیراعظم محمد نواز شریف مالدیپ دے صدر دے نال باضابطہ مذاکرات وی کریسن جڈاں جو ایں موقع تے مختلف شعبیں اچ تعاون سانگے کئی مفاہمت دیاں یادداشتاں تے معاہدیں تے وی دستخط کیتے ویسن ۔
اتھاں امر قابل ذکر ہے جو پاکستان مالدیپ دے نال اپنڑے تعلقات کوں بہوں اہمیت ڈیندا ہے جیرھا جو سانجھے احترام اتے مشترکہ مفادات تے مبنی ہے ۔وزیراعظم دے دورے نال سیاسی، تجارتی، اقتصادی، دفاعی، سیاحتی، تعلیمی اتے عوامی سطح تے رابطے سمیت سارے شعبے اچ دو پاسے تعلقات کوں مزید تقویت مل ویسی ۔ اے دورہ خطے دے ملکاں دے نال فعال تعلقات دی اساڈی پالیسی نال ہم آہنگ ہے۔
