اسلام آباد (پاکستان نیوز پوائنٹ 17اگست 2016ء) وزارت ریلوے ولوں قومی اسمبلی کوں ڈسایا گیا جو پاکستان چین اقتصادی راہداری منصوبے دے تحت کراچی توں پشاور تئیں ریلوے ایم ون دی اپ گریڈیشن دا کم 2020ء وچ مکمل تھیسی' کراچی توں لاہور تئیں ریلوے دا ڈبل ٹریک وچھاڈتا گئے' ای ٹکٹنگ دا نظام متعارف کراونڑ سمیت ریلوے دی چنگائی سانگے بئے اقدامات کیتے گئے ہن'حادثیاں توں بچنڑ سانگے ریلوے سٹیشناں دے آسے پاسے تاراں لاتیاں ویندیا پن، ایندے نال ریلوے دی زمین تے قبضے کو ں روکیا ونج جا سگسی۔
بدھ کوں قومی اسمبلی وچ سوالیں دے وقفے دے دوران ساجد احمد دے سوال دے جواب وچ پارلیمانی سیکرٹری ریلوے دیوان عاشق بخاری ڈسایا جو کراچی توں پشاور سیکشن تے کجھ سیکشن وچ 105 یا 110 کلو میٹر فی گھنٹے دی رفتار نال ٹرین چلدی پئی ہے،کراچی توں لاہور فیز 2018ء تئیں مکمل تھیسی۔ سارے ریلوے ٹریک اتے ریلوے سٹیشناں دی اپ گریڈیشن تھیسی۔ ایندے بعد ٹریک تے 160 کلو میٹر تئیں گاڈیاں چل سگسن۔
انہاں ڈسایا جو پاک چین اقتصادی راہداری منصوبے دے تحت اپ گریڈیشن دا کم 2020ء وچ پورا تھیسی، سی پیک دے تحت ریلوے دی چنگائی سانگے کم تھیندا پئے، 8 جدید ریلوے سٹیشن بنڑائے ویندے پن ،ریلوے سٹیشن دے نیڑے تجاوزات ہن ہنڑ اتھاں تار لا لیندے پئے ہسے۔ انہاں ڈسایا جو پہلے ریلوے دا کراچی توں لودھراں اتے لاہور رائیونڈ تئیں ڈبل ٹریک ہا۔ موجودہ دور وچ 366 کلو میٹر نواںڈبل ٹریک وچھایا گیا ہے۔
ہنڑکراچی توں لاہور تئیں ڈبل ٹریک ہے۔ انہاں ہک ضمنی سوال دے جواب وچ ڈسایا جو ریلوے دا نظام چنگا تھیندا پئے اتے مسافراں دا اعتماد ودھیا ہے۔ ای ٹکٹنگ متعارف کرویندے پئے ہسے۔ علی محمد خان آکھیا جونوشہرہ توں درگئی تئیں ریلوے کوں بحال کیتا ونجے۔ ایندے جواب وچ پارلیمانی سیکرٹریآکھیا جو ایم ایل ون 2020ء وچ اپ گریڈ ہوسی اتے ایجھے روٹ جیرھے جو فائدہ مند ہوسن انہاں کوں کھولسوں۔ گزریل ادوار وچ سیاسی بنیادیں تے ریلوے سٹاپ ڈتے گئے۔اساں انہاں تے نظرثانی کیتی ہے اتے صرف فائدے وچ چلنڑ آلے سٹیشناں کوں برقرار رکھیا ہے۔
