اسلام آباد (پاکستان نیوزپوائنٹ 15 اگست2016ء) حکومت توانائی دیاں ضرورتاں پوریاں کرنڑ سانگے ایل این جی ٹرمینلز تے گیس پائپ لائناں وچھاونڑ سمیت گیس توں متعلقہ مختلف منصوبیں تے 800 ارب روپے خرچ کریسی۔ وزارت پٹرولیم تے قدرتی وسائل دے ذرائع دے مطابق مسلم لیگ (ن) دی حکومت پچھلے ترائے سال دے دوران توانائی دے بحران تے قابو پاونڑ تے خاص طور تے گیس دی قلت کوں گھٹ کرنڑ دے مسلے نال نبڑنڑ سانگے مختلف منصوبے شروع کیتے ہن ،قطر توںایل این جی دی بر آمد موجودہ حکومت دا ہک وڈا کارنامہ ہے ،قطر توں ایل این جی دی در آمد شروع تھیونڑ دے بعد ملک اچ گیس دی گھٹکی دا مسئلہ کافی حد تئیں حل تھی گیا ہے ،تیل تے گیس دے شعبے اچ سرمایہ کاری ودھاونڑ سانگے اقدامات کیتے ویندے پن ،گوادر اچ نواں ایل این جی ٹرمینل بنڑاونڑ تے گوادر نواب شاہ گیس پائپ لائن وچھاونڑ دے نال نال لاہور تے کراچی وچال گیس پائپ لائن منصوبیں کوں وختی پورا کرنڑ سانگے کم تکھا کر ڈتا گیا ہے ۔
ذرائع دے مطابق ترکمانستان، افغانستان، بھارت، پاکستان گیس پائپ لائن تے ایران توں گیس دی درآمد نال ملک اچ توانائی دا مسئلہ حل تھی ویسی ۔ ایران۔پاکستان گیس پائپ لائن منصوبے تے کم شروع کرنڑ سانگے ڈوہیں ملکاں وچال مذاکراتی عمل دا آغاز تھی گیا ہے ۔
