اسلام آباد (پاکستان نیوز پوائنٹ 13 اگست 2016ء) قوم 69واں جشن آزادی (اج) اتوارکوں ایں عزم نال منیسی جو وطن عزیز کو ں امن دی جاہ بنڑیسوں ۔ دہشت گردی اتے انتہا پسندی دی سوچ کوں منڈھ توں مکاڈیسوں۔ ملک کوں اندھیریاں توں نجات اتے ترقی تے خوشحالی دی منزل کوں حاصل کرنڑ سانگے آپنڑیاں ساریاں صلاحیتاں کوں استعمال اچ گھن امسوں۔ جشن آزادی دے موقعے تے سارے ملک اچ عام تعطیل ہوسی ، جشن آزادی دے سلسلے اچ پرچم کشائی دی ساریاں توں وڈی تقریب سویلے 8 وجے کنونشن سنٹر اسلام آباد اچ تھیسی جیندے اچ صدرمملکت ممنون حسین اتے وزیراعظم محمد نواز شریف پرچم کشائی کریسن۔
ایں موقعے تے ملی نغمے وی پیش کیتے ویسن۔ گلگت بلتستان اتے آزاد کشمیر سمیت چارہے صوبائی دارالحکومتاں اچ وی پرچم کشائی دیاں تقریباں تھیسن۔ جشن آزادی دی مناسبت نال تعلیمی اداریاں اچ خصوصی تقریبات دا انعقاد وی کیتا ویسی ۔ جشن آزادی دے حوالے نال وفاقی دارالحکومت دیاں اہم سرکاری عمارتاں تے چراغاں کیتا گئے ۔ ہر پاسے قومی پرچماں اتے جھنڈیاں دی بہار ہے ۔
ایں موقعے تے سیکیورٹی دے سخت انتظامات کیتے گئے ہن ۔ جڑواں شہراں اچ اتوارکوں سویلے 6 وجے توں ڈینھ 12 وجے تئیں موبائل سروس بند راہسی ۔ دفترخارجہ اچ آرٹ نمائش دا اہتمام کیتا گئے جیندا موضوع ''مقصد کیتے فن'' ہے ، وزیراعظم دے مشیر خارجہ امور سرتاج عزیز، وفاقی وزیر اطلاعات ونشریات سینیٹر پرویز رشید اتے وزیراعظم دے معاون خصوصی عرفان صدیقی نمائش دا دورہ کریسن۔
13 اتے 14اگست دی وچالی رات اسلام آباد میٹرو پولیٹن کارپوریشن ولوں شکرپڑیاں پریڈ گرائونڈ جڈانجو ورلڈ ٹریڈ سنٹر اسلام آباد اچ شاندار آتشبازی دا اہتمام کیتا گئے ۔ ساری دنیا اچ پاکستانی سفارتخانیاں اچ وی پرچم کشائی دیاں خصوصی تقریباں دا انعقاد کیتا گئے ۔ جتھاں پاکستانی ہائی کمشنراتے سفیر پاکستانی کمیونٹی نال نال قومی پرچم لہریسن۔ جشن آزادی دے موقعے تے اخبارات خصوصی ایڈیشن شائع کریسن جیندے اچ قیام پاکستان کیتے ڈتیاں ونجن آلیاں قربانیاں کوں اجاگرکیتا ویسی جڈانجو ٹیلی ویژن چینلاں تے خصوصی پروگرام ٹیلی کاسٹ کیتے ویسن۔
