اسلام آباد(پاکستان نیوز پوائنٹ 06 اگست 2016ء) چیئر مین سینٹ میاں رضا ربانی آکھے جو سینٹ کوں پبلک اکاؤنٹس کمیٹی اچ نمائندگی ڈیونڑ تے حکومت دے شکر گزار ہئیں ، اختیارات دی تلویں سطح تے منتقلی دے اقدام دے خلاف کئی قدم چاتا گیاتاں تریخ اساکوں معاف کائناں کریسی ۔ اساں کوں قوم ہونڑ دے طور تے ، پارلیمنٹ ، پارلیمانی اداریاں اتے آئین دے تحت کم کرنڑآلیاں اداریاں دا احترام کرنڑاں ہوسی ۔
کالا باغ ڈیم کیتے ساریاں توں چنگا فورم مشترکہ مفادات کونسل ہے ایں کوں اتھاں بحث اچ گھن آیا ونجے ۔ چھنڑ چھنڑ کوں سینٹ دے 44ویں فاؤنڈیشن ڈے دے موقعے تے تھیونڑآلے وفاق کوں پیش آونڑ آلے چیلنج اتے سینٹ دے کردار دے موضوع تے سیمینار نال الیندے ہوئیں انہاں اے گالہیں آکھیاں۔انہاں آکھیا جو وفاق دی ونڈ کرنڑ نال ایں کوں کمزور کرنڑ دی سوچ مر چکی ہے ۔
پاکستان دی نویں نسل آپنڑیں قومیت اتے زبان کوں اپناونڑاں چاہندی ہے ۔ جئیں ویلھے تئیں ریاست انہاں دیاں امنگاں اتے امیداں کوں آئینی طورتے تسلیم نہیں کریندی وفاق مضبوط نہیں تھی سگدا۔ انہاں آکھیا جو اے گالھ ٹھیک ہے جو ہک بہوں لمبی جدوجہد دے بعد سینٹ اچ اساں آپنڑیں حیثیت تسلیم کروائی ۔ اٹھارویں ترمیم دے بعد اے آئین دا تقاضا ہے جو سینٹ کوں پبلک اکاؤنٹس کمیٹی اچ نمائندگی ڈتی ونجے ۔ اساں ایندے تے حکومت اتے سینٹ اچ حکومتی بنچاں دے شکر گزار ہئیں ۔
