کوئٹہ (پاکستان نیوز پوائنٹ 06 اگست 2016ء) صدر مملکت ممنون حسین آکھے جو موجودہ منتخب حکومت دے دور اچ مثبت اتے دانشمندانہ معاشی پالیسیاں پاروں پاکستانی زر مبادلہ دے ذخائر ملکی تریخ دی بلند ترین سطح تے 23 ارب ڈالر تئیں پج گئے ہن ۔ معاشرے دے باشعور طبقیاں دا فرض ہے جو او حکومت دے چنگے اقدامات کوں عوامی سطح تے مثبت انداز اچ پیش کرنڑ کیتے آپنڑاں کردار ادا کرن۔
اے گالہیں انہاں گورنر ہاؤس کوئٹہ اچ قبائلی عمائدین وزعماء دے نمائندہ وفد نال گالھ مہاڑ اچ آکھیاں ۔ ایں موقعے تے گورنر بلوچستان محمد خان اچکزئی اتے وزیراعلیٰ بلوچستان نواب ثناء اللہ خان زہری وی موجود ہن ۔ صدر مملکت آکھیا جو موجودہ حکومت کوں 2013دے انتخابات دے ویلھے 14 ہزار اٹھ سو ارب روپے دا قرضہ ورثے اچ ملا ، 2013 توں 2016 تئیں قرضے دے حجم اچ صرف 34 فیصد ودھارا تھئے ۔
ایندے برعکس 2008 توں 2013 تئیں پنج سالیں اچ ملکی قرضیاں اچ ڈو سو فیصد ودھارا تھئے ۔ موجودہ حکومت وزیراعظم محمد نواز شریف دی قیادت اچ موثر معاشی اصلاحات کرتے گزریل ترائے سالیں اچ باہرلے قرضیاں دے حجم کوں صرف 21 فیصد تئیں محدود رکھیا ہویا ہے ۔ صدرمملکت آکھیا جو وزارت خزانہ پاکستان مستقبل اچ آئی ایم ایف توں کئی وی نواں قرضہ نہ گھنڑ دا فیصلہ کیتے جیہڑا جو ہک چنگا قدم ہے ۔
ایں فیصلے نال ملکی معیشت مستحکم اتے مضبوط تھیسی ۔ صدر ممنون حسین آکھے جو پاک چین اقتصادی راہداری پاکستان کیتے قدرت ولوں ہک ایسی نعمت ہے جیندے تے اساکوں اللہ تعالیٰ دا شکر گزار تھی تے ایں نعمت توں پوری طرح فیدہ چاونڑ کیتے سخت محنت نال کم کرنڑاں ہوسی ۔ انہاں آکھیا جو سی پیک دے مغربی روٹ اچ کئی تبدیلی کائنی کیتی گئی اتے ایں بارے ساریاں خبراں کوڑیاں ہن ۔ صدرمملکت شرکاء تے زور ڈتاجو او عوامی مفاد اچ کیتے گئے اقدامات اتے انہاں دے پھل بارے لوکیں کوں دساون۔
