اسلام آباد (پاکستان نیوز پوائنٹ 06 اگست 2016ء) وزیر اعظم محمد نواز شریف آکھے جو پاکستان مقبوضہ کشمیر اچ بھارتی سیکیورٹی فورسز دے ریاستی جبر نال متاثرہ کشمیریاں دے علاج معالجے کیتے انتظامات چاہندے ۔ وزیر اعظم آکھے جو پاکستان خصوصی طور تے پیلٹ بندوقاں دے متاثرین دیاں اکھیں دا دنیا اچ کتھائیں وی موجود طبی سہولتاں دے زریعے علاج کراونڑاں چاہندے ۔
وزیراعظم عالمی برادری تے زور ڈتے جو او بھارت تے آپ دا اثر رسوخ استعمال کرے تانجو پاکستان مقبوضہ وادی اچ حالیہ جاری انسانی بحران دے تناظر اچ متاثرین دے علاج معالجے دا اہتمام کر سگے ۔ چھنڑ چھنڑ کوں اتھاں جاری پریس ریلیز دے مطابق وزیر اعظم محمد نواز شریف آکھے جو مقبوضہ کشمیر اچ انسانی بحران دی شدت اساکوں مجبور کرڈتے جو اساں متاثرین دے علاج معالجے کیتے فوری طور تے آپ دے مادی اتے انسانی وسائل کوں استعمال اچ گھن آندے ہوئیں انہاں دی مدد کروں۔
انہاں آکھیا جو ظلم دی حد اے ہے جو مقبوضہ کشمیر اچ بنیادی صحت دیاں سہولتاں ڈیونڑآلے لوک اتے اداریاں کوں وی متاثرین دے مناسب علاج معالجے دی اجازت کائنی ڈتی ویندی پئی ۔ وزیر اعظم آکھیا جو بھارتی سیکیورٹی فورسز پر امن اتے ہتھوں خالی بے گناہ مظاہرین کوں علاج معالجہ ڈیونڑآلے ہسپتالاں اتے ایمبو لینس گاڈیاں کوں وی نشانہ بنڑیندی پئی ہے ۔
وزیراعظم آکھیا جو پاکستان کشمیریاں دی اخلاقی ، سیاسی اتے سفارتی حمایت جاری رکھیسی ۔ وزیر اعظم وزارت امور خارجہ کوں ہدایت کیتی جو او بھارت تے دباؤ پاونڑکیتے باہرلے ملکاں اچ پاکستانی مشنز دے ذریعے عالمی سیاسی قیادت ، انسانی حقوق دیاں تنظیماں اتے سول سوسائٹی دی حمایت کو ں متحرک کرے تانجو او حکومت پاکستان کوں مقبوضہ کشمیر اچ انسانی بنیاداں تے متاثرین دے علاج معالجے دا اہتمام کرنڑ دی اجازت ڈیوے ۔
