اسلام آباد (پاکستان نیوز پوائنٹ 06 اگست 2016ء) وزیراعظم محمد نواز شریف ملک دے مختلف حصیاں اچ توانائی دے جاری منصوبیاں دے ویلھے سرپورے تھیونڑ دی ہدایت کیتی ہے اتے آخھے جو آپ ہر ڈو ہفتے بعد انہاں منصوبیاں تے اگوہیں دا جائزہ گھنسن۔ وزیراعظم آکھے جو او منصوبیاں دے ویلھے سر پورے تھیونڑ کیتے سائیٹس دے دورے کریسن ۔ او چھنڑ چھنڑ کوں اتھاں وزیراعظم ہاؤس اچ توانائی بارے ہک اجلاس دی صدارت کریندے پئے ہن ۔
وزیراعظم آکھیا جو جاری منصوبیاں دے پورے تھیونڑ نال قومی گرڈ اچ بجلی دا نمایاں ودھارا تھیسی اتے ملک اچ لوڈ شیڈنگ دا ہمیشہ کیتے خاتمہ تھی ویسی ۔ وزیراعظم آکھیا جو بجلی دی پیداوار اچ ودھارے نال صنعتی سرگرمیاں بیاں اگوں تے ودھسن۔ جیندے نال اقتصادی ودھارے اچ مدد ملسی۔ وزیراعلیٰ پنجاب محمد شہباز شریف، وزیر پٹرولیم شاہد خاقان عباسی، وزیر پانڑیں تے بجلی خواجہ محمد آصف اتے بئے اعلیٰ حکام وی ایں اجلاس اچ موجود ہن ۔
وفاقی سیکرٹری پانڑیں تے بجلی اجلاس دے شرکاء کوں بریفنگ ڈتی اتے ڈسایا جو 2016ء گزریل ڈھا سالیں اچ بجلی دی پیداوار بارے بہوں چنگا اتے مستحکم سال ریہا ہے۔ وزیراعظم کو ں2017ء توں گھن تے مارچ 2018ء تئیں دے عرصے اچ پورے تھیونڑآلے بجلی دے پیداواری منصوبیاں دے نظام الاوقات دے بارے ڈسایا گیا۔ ایں ڈے گئے ویلھے اچ پورے تھیونڑ آلے منصوبیاں اچ گدو پاور پراجیکٹ اتے نندی پور پاور پلانٹس کوں گیس تے منتقل کرنڑ دے منصوبے وی شامل ہن ۔
جیندے نال بالترتیب 400 اتے 125 میگاواٹ دی وادھو بجلی پیدا تھیسی ۔ ایں توں علاوہ انہاں منصوبیاں اچ پنجاب اچ ایل این جی نال چلنڑآلے ترائے پلانٹ شامل ہن جنہاں نال 2400 میگاواٹ بجلی دی پیداوار دی توقع ہے ۔ ایں توں علاوہ 1350 میگاواٹ دی صلاحیت رکھنڑ آلے ساہیوال کول پاور پراجیکٹ ، 1320 میگاواٹ دی صلاحیت دا پورٹ قاسم پاور پلانٹ ، 650 میگاواٹ دے ڈو جوہری پلانٹ 979 میگا واٹ دا نیلم جہلم پراجیکٹ اتے تربیلا چار توسیع منصوبہ شامل ہن جنہاں نال 1500 میگاواٹ بجلی قومی گرڈ اچ شامل تھیسی ۔ اجلاس دے شرکاء کوں یقین ڈیوایا گیا جو مار چ 2018ء تئیں قومی گرڈ اچ انہاں منصوبیاں نال ملنڑ آلی بجلی شامل تھی ویسی ۔
