اسلام آباد (پاکستان پوائنٹ نیوز 03 -اگست 2016ء) وفاقی وزیر جنرل (ر) عبدالقادر بلوچ آکھے جو سعودی عرب اچ پھتے ہوئے سمندر پار پاکستانیاں دا معاملہ بہوں سنجیدہ نوعیت دا ہے' 520 پاکستانیاں ولوں کمپنی کولوں تنخواہ نہ ملنڑ دیاں شکایتاں ملیاں ہن ، سمندر پار پاکستانیاں دی وزارت معاہدے دی خلاف ورزیاں کرنڑآلیاں کمپنیاں دی تحقیقات کریسی ، سعودی کمپنی اوجر وطن واپس ونجنڑدے خواہش منداں کوں ٹکٹ ڈیونڑ اتے اقامہ دی منتقلی کرنڑ آلیاں کوں مدد دی پیشکش کیتی ہے ۔
بدھ کوں قومی اسمبلی دے اجلاس اچ میر عامر علی خان مگسی دے سعودی عرب اچ پھتے ہوئے سمندر پار پاکستانیاں بارے توجہ ڈیوائو نوٹس دے جواب اچ وفاقی وزیر جنرل (ر) عبدالقادر بلوچ آکھیا جو ایں ویلھے تقریباً ڈو ملین توں ودھ پاکستانی سعودی عرب ا چ کم کریندے پئے ہن ۔ انہاں آکھیا جو اتھوں کجھ ایجنٹ گھٹ صلاحیت رکھنڑ آلیاں کوں وی باہرے ملک پٹھ ڈیندے ہن اتے جئیں ویلھے او باہرلے ملکاں اچ کمپنیاں دے مطلوبہ معیار تے پورا نہیں امدے تاں انہاں کوں کڈھ ڈتا ویندے ۔
ہک سوال تے جواب اچ انہاں آکھیا جو ایں معاملے تے وزارت خارجہ نال گالھ کیتی ویسی اتے رکناں کوں وزارت خارجہ توں بریفنگ دا وی اہتمام کیتا ویسی ۔ انہاں آکھیاجو سعودی عرب نال اساڈے بہوں خاص تعلقات ہن ۔ اساں نہیں چاہندے جو سعودی عرب اچ کم کرنڑ آلے پاکستانیاں دا روزگار متاثر تھیوے ۔ ڈپٹی سپیکر ہدایت کیتی جو سارے متعلقہ رکناں کوں وزارت خارجہ ولوں بریفنگ ڈتی ونجے اتے پارلیمنٹ کوں ہک ہفتے اچ ایں بارے پوری رپورٹ پیش کیتی ونجے ۔
جیکر وزارت خارجہ دی غفلت ثابت تھئی تاں پارلیمنٹ ولوں سخت کارروائی کیتی ویسی ۔ انہاں آکھیا جو ملک توں باہر ہک چوتھائی پاکستانیاں دی تعداد سعودی عرب اچ ہے ۔ اساں کڈاہیں نہ چاہسوں جو پاکستانیاں نال غلاماں دی طرح دا سلوک کیتا ونجے ۔ سعودی حکومت متاثرہ پاکستانیاں دے مسلیاں کیتے ہک کروڑ ریال رکھے ہن ۔ ہک بئے سوال دے جواب اچ انہاں آکھیا جو 12 لکھ پاکستانی مزدوراں دی واپسی بارے اساڈے کولوں کئی خبر کائنی ۔
