وزيراعظم شاهد خاقان عباسي سان ٽيلي نار جي چيف ايگزيڪيوٽو آفيسر جي ملاقات

ڊيووس (پاکستان نیوزپوائنٹ24جنوری2018ء) وزيراعظم شاهد خاقان عباسي سان ٽيلي نار جي چيف ايگزيڪيوٽو آفيسر عالمي اقتصادي فورم جي موقعي تي ملاقات ڪئي. وزيراعظم جو خصوصي معاون علي جهانگير صديقي ۽ سينيئر سرڪاري عمدار پڻ ان موقعي تي موجود هئا. وزيراعظم پاڪستان ۾ سڌي ۽ اڻ سڌي اٽڪل هڪ لک 30 هزار پاڪستانين جي لاءِ روزگار جا موقعا فراهم ڪرڻ تي ٽيلي نار کي ساراهيو ۽ افرادي قوت جي تربيت ۽ ترقي جي شعبي ۾ سيڙپڪاري کي ساراهيندي ٽيلي نار جي چيف ايگزيڪيوٽو آفيسر جا ٿورا مڃيا. وزيراعظم اسلام آباد ۾ ٽيلي نار جي نئين هيڊڪوارٽر جي افتتاح جو حوالو ڏيندي چيو ته هن پاڪستان ۾ ڪم ڪرڻ جي ماحول جي لاءِ نوان معيار قائم ڪيا آهن. ٽيلي نار جي چيف ايگزيڪيوٽو آفيسر پاڪستان ۾ ٽيلي نار جي آپريشن ۾ سهولت فراهم ڪرڻ تي وزيراعظم جا ٿورا مڃيا ۽ ان اميد جو اظهار ڪيو ته پاڪستاني ورڪ فورس کي جديد ترين ٽيلي ڪام ٽيڪنالاجي ۾ تربيت جي فراهمي سميت ٽيلي نار پنهنجي آپريشنن کي وڌيڪ سگهه ڏيندي. هن چيو ته ٽيلي نار پاڪستان ۾ آزاداڻي پاليسي جي ماحول ۾ سيڙپڪاري جا نوان موقعا ڳولڻ جي خواهشمند آهي، پاڪستان ۾ سيڙپڪاري جي لاءِ معاون ريگيوليٽري رجيم سان وڌيڪ سهولتون مليون آهن. واضح رهي ته ٽيلي نار 2005ع کان پاڪستان ۾ آپريٽ ڪري رهي آهي ۽ هن ايزي پئسا جي نالي سان موبائيل فنانشل ٽرانزيڪشن جو نظام پڻ متعارف ڪرايو آهي. ٽيلي نار هيستائين پاڪستان ۾ 3.5 ارب ڊالر کان وڌيڪ جي سيڙپڪاري ڪري چڪي آهي.