نیویارک(پاکستان نیوزپوائنٹ20ستمبر2017ء) جاپان نا وزیراعظم شنزوایبے نا افریقی راہشون آتون اوڑدہی ٹی قطبی کوریا نا برخلاف زور شاغنگ آ خیال آتا درشانی ءِ کننگا۔ جاپانی میڈیا نا رداٹ اقوام متحدہ نا جنرل اسمبلی نا دیوان نا وخت آ جاپان نا وزیراعظم شنز وایبے نیویارک اٹی ایتھوپیا و سینیگال تون اوار پنچ افریقی ملک آتا سروک آتون اوڑدہی کرے ہراٹی قطبی کوریا نا جوہری آزموندہ نا حوالہ ءِ ترسا پارے کہ اودے غیر معمولی گام و جہانی برادری نا امن و سلامتی کن خلیس اس گوندنگا۔
اوافریقی راہشون آتون عسکری بشخ اٹی کمکاری ءِ توننگ و گڑاتا واپار و سفری پابندی عائد کرسا قطبی کوریا آ زور شاغنگ کن اواری اٹ کاریم کننگ نا ہم پارے۔ داوخت آ افریقی راہشونک پاریر کہ دا جوہری آزموندہ جہانی برادری ءِ براہ راست چیلنج کننگ نا بریبر ءِ و افریقی ملک آک دا چرجوئی ٹی جاپان نا موقف نا پبی مخ تفی ءِ کیرہ۔
