بيجنگ (پاکستان نیوزپوائنٹ09ستمبر2017ء) ناڻي واري وفاقي وزير سينيٽر اسحاق ڊار چيو آهي ته پاڪ چين اسٽريٽجڪ لاڳاپا علائقائي امن ۽ استحڪام جا ضامن آهن، سي پيڪ منصوبي سان ٻنهي ملڪن جي وچ ۾ ٻطرفا لاڳاپا وڌيڪ مستحڪم ٿيندا. بيجنگ ۾ پنهنجي چيني هم منصب زياوجي سان ملاقات دوران ڳالهائيندي اسحاق ڊار چيو ته پاڪستان ۽ چين جي وچ ۾ سياسي، اداراجاتي ۽ هر سطح تي خوشگوار ۽ ٻطرفا لاڳاپا موجود آهن جڏهن ته سي پيڪ منصوبي سان اهي لاڳاپا وڌيڪ مضبوط ٿيا آهن. هن چيو ته اهو منصوبو ٻنهي ملڪن کي هڪ ٻئي جي ويجهو آڻيندو. هن پنهنجي چيني هم منصب کي ڪاريڪ انسٽيٽيوٽ جي افتتاح تي مبارڪباد ڏني ۽ چيو ته پاڪستان انسٽيٽيوٽ جي سرگرمين ۾ فعال شرڪت کي جاري رکندو. ملاقات دوران ٻنهي وزيرن گڏيل دلچسپي جي معاملن سميت ٻطرفن اقتصادي لاڳاپن کي وڌيڪ وڌائڻ جي مختلف رخن تي خيالن جي ڏي وٺ ڪئي. چين جي ناڻي واري وزير زياوجي چين جي دوري تي اسحاق ڊار جي آجيان ڪئي ۽ چيو ته ٻن پاڙيسري ملڪن جي وچ ۾ اعليٰ سطح تي دورا مستحڪم ٻطرفن لاڳاپن جي مقصد کي وڌيڪ اڳتي وٺي وڃڻ ۾ مددگار ثابت ٿيندا. هن سي پيڪ منصوبي تي وقت سر عملدرآمد جي لاءِ پاڪستان حڪومت جي ڪوششن کي ساراهيو.
پاڪ چين اسٽريٽجڪ لاڳاپا علائقائي امن ۽ استحڪام جا ضامن آهن: اسحاق ڊار
7 سال پھريان
