پاڪستان شنگهائي تعاون تنظيم (ايس سي او) جي مڪمل ميمبر جي حيثيت سان علائقائي امن، رابطن ۽ اقتصادي خوشحالي جي لاءِ تنظيم جا گڏيل مقصد حاصل ڪرڻ جي لاءِ وڌيڪ ڪوششون استعمال ۾ آڻيندو: وزيراعظم محمد نواز شريف

آستانه (پاکستان نیوزپوائنٹ 9جون2017ء) وزيراعظم محمد نواز شريف چيو آهي ته پاڪستان شنگهائي تعاون تنظيم (ايس سي او) جي مڪمل ميمبر جي حيثيت سان علائقائي امن، رابطن ۽ اقتصادي خوشحالي جي لاءِ تنظيم جا گڏيل مقصد حاصل ڪرڻ جي لاءِ وڌيڪ ڪوششون استعمال ۾ آڻيندو. هن اها ڳالهه ڪالهه جمعي ڏينهن ايس سي او جي مملڪتي سربراهه ڪائونسل جي اجلاس کي خطاب ڪندي چئي. وزيراعظم چيو ته پاڪستان پرامن پاڙيسريت جي پاليسي تي ڪاربند آهي. هن ايندڙ نسلن جي لاءِ امن ۽ هم آهنگي جي فروغ تي زور ڏنو. هن چيو ته پنهنجي توسيع سان ايس سي او حقيقي طور تي بين البراعظمي تنظيم بڻجي چڪي آهي. هن چيو ته ايس سي او عالمي تبديلين جي ڏس ۾ علائقائي ترقي ۽ خوشحالي جي لاءِ نمايان ۽ اهم ڪردار ادا ڪيو آهي. وزيراعظم چيو ته ايس سي او ميمبر ملڪن کي هڪجهڙي خوشحالي ۽ رابطن جي فروغ ۽ انتهاپسندي، دهشتگردي، غربت، بيروزگاري جي خاتمي سان گڏوگڏ موسمياتي تبديلي ۽ پاڻي تحفظ کي منهن ڏيڻ جي لاءِ پليٽ فارم مهيا ڪيو. هن چيو ته پاڪستان دهشتگردي ۽ انتهاپسندي جي براين کي ڪاميابي سان منهن ڏنو. موجوده حڪومت ملڪي معيشت بحال ڪئي آهي. هڪ جهڙي خوشحالي لاءِ ايس سي او جا مقصد پاڪستان جي بنيادي قدرن سان هم آهنگ آهن. هن چيو ته پاڪستان پاڪ چين اقتصادي لنگهه تي جيئن جو تيئن عمل ڪري رهيو آهي جيڪو هڪ پٽي هڪ رستو (ون بيلٽ ون روڊ) جي قدمن جو فليگ شپ منصوبو آهي. هن چيو ته ان سان سمورن ايس سي او ميمبرن کي فائدو ٿيندو. وزيراعظم ڀارت کي پاڪستان سان ايس سي او جو مڪمل ميمبر بڻجڻ تي مبارڪباد ڏيندي چيو ته اهو پاڪستان جي لاءِ ۽ ايس سي او جي ميمبرن جي لاءِ پڻ هڪ تاريخي ڏينهن آهي. وزيراعظم تنظيم جو مڪمل ميمبر بڻجڻ لاءِ پاڪستان جي ڀرپور حمايت ڪرڻ تي چين، روس سميت باني ميمبرن ۽ ٻين جا ٿورا مڃيا. هن چيو ته پاڪستان ايس سي او جي نظام کان اڻواقف نه آهي پر هن سربراهه اجلاس ۾ شرڪت ۽ ان جي مختلف فورمن تي گڏجي ڪم ڪندي گهرا رابطا قائم ڪيا آهن. هن چيو ته پاڪستان بدلجندڙ عالمي ماحول ۾ باني ميمبرن مان فائدو کڻڻ جو خواهشمند آهي. سربراهه اجلاس ۾ قزاخستان جو صدر نور سلطان نذربايوف، چين جو صدر شي جن پنگ، ڪرغزستان جو صدر الماس بيگ اتام بايوف، روس جو صدر ولادي مير پيوٽن، تاجڪستان جو صدر امام علي رحمانوف، ازبڪستان جو صدر شوڪت مرزوف، افغانستان جو صدر اشرف غني، بيلاروس جو صدر اليگزينڊر لوڪا شينڪو، منگوليا جو صدر تاخيا جن البگدورج ۽ ڀارت جو وزيراعظم نريندر مودي پڻ موجود هئا.