مخالف ڌر جو موقف به سڌو سنئون عوام تائين وڃڻ گهرجي، اسان قربانيون ڏئي جمهوريت کي بحال ڪرايو آهي: سيد خورشيد احمد شاهه

اسلام آباد (پاکستان نیوزپوائنٹ 30مئ2017ء) قومي اسيمبلي ۾ مخالف ڌر اڳواڻ سيد خورشيد احمد شاهه چيو آهي ته حڪومت جئين مخالف ڌر جو موقف به سڌو سنئون عوام تائين وڃڻ گهرجي، گذريل ڏينهن بجيٽ تي بحث شروع ڪرڻ بدران اسان جي واڪ آئوٽ کانپوءِ اجلاس ملتوي ڪري ڳالهين ذريعي مسئلو حل ٿي پئي سگهيو، اسان قربانيون ڏئي جمهوريت کي بحال ڪرايو آهي، عوام مسلم ليگ (ن) کي مينڊيٽ ڏنو آهي، پنج سال حڪومت ڪرڻ ان جو حق آهي، جڏهن ته قومي اسيمبلي جي اسپيڪر سردار اياز صادق چيو آهي ته هن 2002ع کان اڄ تائين جو رڪارڊ ڪڍرائي ڏٺو آهي، صرف 2015ع ۾ هڪ دفعو مخالف ڌر اڳواڻ جي تقرير سڌي سنئين ٽيلي ڪاسٽ ٿي، ڪالهه اڱاري ڏينهن قومي اسيمبلي جي اجلاس ۾ قومي اسيمبلي ۾ مخالف ڌر اڳواڻ سيد خورشيد احمد شاهه اعتراض واري نقطي تي چيو ته گذريل ڏينهن اسان هي درخواست ڪئي هئي ته حڪومت جو بجيٽ جي حوالي سان موقف عوام جي سامهون اچي ويو آهي، اسان چاهيون ٿا ته اسان کي به برابري جو حق ملڻ گهرجي. اسان جو موقف به عوام جي سامهون انهي طرح وڃڻ گهرجي جهڙي طرح حڪومت کي موقعو فراهم ڪيو ويو آهي. گذريل ڏينهن مخالف ڌر جي غير موجودگي ۾ اجلاس نه هلڻ گهربو هو، ڳالهين ذريعي ڪجهه نه ڪجهه رستو ڪڍي سگهبو هو. سيد خورشيد احمد شاهه چيو ته پارليامينٽ تي ڪو به حرف ايندو آهي ته اسان کي ان لاءِ تڪليف ٿئي ٿو ڇو ته جمهوريت جي لاءِ محترمه بينظير ڀٽو پنهنجي خون جي قرباني ڏني آهي، اپوزيشن ان عمل ۾ شامل نه ٿي ته ان بجيٽ کي ڪير به نه مڃيندو. معاملا طاقت جي زور تي نٿا هلائي سگهجن، هن چيو ته حڪومت کي جمهوري روايتن کي نظر ۾ رکڻ گهرجي. قومي اسيمبلي جي اسپيڪر سردار اياز صادق چيو ته مون سدائين حڪومت ۽ اپوزيشن جي وچ ۾ معاملا بهتر بڻائڻ جي ڪوشش ڪئي آهي، مون ته انهن کان درخواست ڪئي هئي ته ۽ اهو ئي ڪري سگهان ٿو، منهنجي درخواست آهي ته مخالف ڌر اڳواڻ پنهنجي بجيٽ تقرير جو آغاز ڪري ، ان تي سيد خورشيد احمد شاهه چيو ته سينيٽ چيئرمين جي حڪم تي سينيٽ ۾ مخالف ڌر اڳواڻ جي تقرير ٽي منٽ سڌي سنئين ڏيکارڻ جو انتظام ڪيو ويو، اسپيڪر به پنهنجا اختيار استعمال ڪري، اسپيڪر چيو ته مون مڪمل رڪارڊ چيڪ ڪرايو آهي 2015ع کانسواءِ ڪنهن سال به سڌي سنئين تقرير جو ڪو به رڪارڊ سامهون نه آيو.