اسلام آباد جي اسڪولن ۾ 53 سيڪڙو شاگردن جي منشيات جي عادي هجڻ جي خبرن ۾ ڪا حقيقت نه آهي: مملڪتي وزير طارق فضل چوڌري

اسلام آباد (پاکستان نیوز پوائنٹ 23نومبر2016ء) ڪيپيٽل ايڊمنسٽريشن اينڊ ڊولپمينٽ ڊويزن جي مملڪتي وزير ڊاڪٽر طارق فضل چوڌري چيو آهي ته اسلام آباد جي اسڪولن ۾ 53 سيڪڙو شاگردن جي منشيات جي عادي هجڻ جي خبرن ۾ ڪا حقيقت نه آهي، هڪ اين جي او جي بي بنياد رپورٽ جي بنياد تي اها خبر ڏني وئي آهي، اين جي او خلاف قانوني ڪارروائي جو پڻ جائزو وٺي رهيا آهيون. ڪالهه اربع ڏينهن سينيٽ ۾ سينيٽر حافظ حمدالله جي ڌيان ڇڪايو نوٽيس جي جواب ۾ هن چيو ته سينيٽ جي گهرو معاملن بابت اسٽينڊنگ ڪميٽي جي اجلاس ۾ پڻ اهو معاملو غور هيٺ آيو ۽ قومي اسيمبلي ۾ پڻ ان تي ڌيان ڇڪايو نوٽيس پيش ڪيو ويو. هن چيو ته اهڙين خبرن جو مقصد صورتحال کي وڌيڪ خطرناڪ بڻائي پيش ڪرڻ ۽ پنهنجا فائدا حاصل ڪرڻ آهي جنهن اين جي او جي رپورٽ جي بنياد تي اها خبر ڏني وئي آهي ان جي ڪا حيثيت نه آهي. رپورٽ ۾ 8 سالن جي ٻارن کي پڻ منشيات جو عادي ظاهر ڪيو ويو آهي، اسان ان اين جي اوز جي خلاف قانوني ڪارروائي جو پڻ جائزو وٺي رهيا آهيون. هن چيو ته اسلام آباد جي سرڪاري اسڪولن ۾ خصوصي مئنيجمينٽ ڪميٽيون ڪم ڪري رهيون آهن جن جا سربراهه ٻارن جا والدين هوندا آهن ۽ اسلام آباد جي سمورن 422 سرڪاري اسڪولن ۾ سگريٽ نوشي تي مڪمل پابندي آهي.